Hruaitu ṭha kan mamawh

Kan dinhmun - Distric Council aṭangin U.T. kan ni, chuta ṭangin state. Central sawrkarin kan intodelh nan leh kan in enkawl zelna atan kum tin cheng vaibelchhe tel min rawn pe ṭhin a, mah se vawiin thlengin a rah hmuh tur a la awm lo. Ei leh barah ka la intodelh chuang lo.

Zirna lamah kan ṭhang nasa a, Ph.D te pawh kan awm fer fur ta mai, mah se a thawh tur lam a awm leh si lo a, kan ṭhalaite an beidawn a hlauhawm hle mai. Industry, factory han tih tham kan la nei chuang lo. State dang chuan an nei thleh thluah sia. In ti nalh taka motor chhuak thar apiang neih a, tlan kual vel mai mai hi kan tih theih tawk a ang riau, a zia lo hle mai.

Hruaitu ṭha chuan ram ṭhatna tur a nih phawt chuan mualpho leh chan pawh a in huam a. Mahni party ṭhatna tur ringawt leh lal rei theih dan tur ringawt a ngaihtuah ngai lo, mipuiten an buk tling zawk mai ṭhin.

Kan ṭhenawm lawka mi, Manik Sar­kar khu a that em avangin a sawrkar kha mipuiten an ning hlei thei lo. W.Bengal C.M. hlui, Jyoti Basu-te pawh kha rorel thiam, mi rinawm a ni a, India rama C.M. ni rei thei ber a ni hial. A thih hnu pawh khan midangte tan tiin a taksa bung hrang hrang a donate vek a ni.

Kan P.M. ni mek, Gujarat C.M. ṭhin hi a hnathawh ṭhat em avangin ram khat hruaitu lu ber a lo ni ta a ni. Eng emaw deuhah kan ram hruaitute kan mawhpuh zung zung a, mipuite pawh hian kan ti dik bik lo. Kan hruaitute hi kan vir nasa lutuk a, ṭhenkhat phei chuan thil pek te nen kan um a, a tawpah kan dem leh tho ṭhin.

Hna lak turah ni se, mahni a inziah tlin tum aiin Minister-te power hmanga tlin kan tum zel a. Inthlan lai ten kan han pui ve a, kan puih ve man kha uar takin kan han bill leh si ṭhin a; duh lo chung chungin thiltihawm mang lo te kan tihtir ta ṭhin a ni.

Ram hmangaih­tuten kan rilru suk­thlek kan tih danglam a ngai; Party unit level aṭanga a lu ber thlengin. Ram enkawl hi kan tu leh fate thlenga nghawng lian tak nei thei a ni a, sum hmuh theihna tur a nih vanga pawisak neih loh ngawt te hi pawi tak a ni.

Kan han lal rei deuh a, kan lo nuamsa ta a, tumah kan hre tawh lo fo mai, ram hmangaihtuten sum tam tak aia hming ṭhat kan thlan ngam a hun ta. Ram hruaitu ropui tak takte chanchin kan hria a, mipuiten an hlawk puizia pawh kan hria ang.

Keini pawh hruai­tu ropui tak kan ni ve thei e. I tum chuan, engkim chan i inhuam chuan i hlat lo a ni, tih hre rawh le. Khawvela ram hruaitu ropui tak takte chanchin in chhiar chuan an lo hausakzia emaw thil an tih theihzia emaw lam a ni lo; a tirah chuan berh ve te te, fing lo ve tak tak te an ni, mah se an tumruhna te, rinawmna te, tai­makna te, an vawng tlat a, a tawpah an lo hlawh­tling ta ṭhin a ni.

Zoram hian Pathian ṭih mi, hruaitu ṭha tling, a ngaihna hria, kan mamawh hle mai.

- Lalchhandama Colney