BJP leh MNF inkar boruak hi
Mizoramah chuan MNF leh BJP hi party thawk ho lo angin lang ṭhin mahse Mizoram Chief Minister in tun hnaia Chief Secretary atana Mizo a dilnaah khan chiang takin BJP hnuaia an kûn thu kha a ziak lang a ni.
Kha lehkha kha han sawi zui dawn viau ila Mizoram BJP President-in MNF a sawi zui dan nen chuan BJP leh MNF hi inkawp lo ang mai an ni leh bawk si a, Mizorama BJP lo Delhi lama BJP ang si hian kan MNF party hi an awm an awm kawi hi a ang ṭhin a ni.
Chief Minister-in Chief Secretary atana Mizo ngei a duh thu a thlenna lehkha kha Whatsapp lamah keini tak ngial pawhin kan lo hmu phak ve a. Sorkar lehkha pawimawh mipui hmuha a awm hi tu vang nge ni ṭhin ang? tih ngaihtuahna pawh a lo piang nghal bawk.
Kha lehkhaah khan MNF President Pu Zoramthanga khan, "I am the only one in the whole North East States, which have been a faithful partner of NDA from the beginning upto this time, I therefore believe that I deserve a special favour and consideration for this faithful friendship with NDA," tiin huaisen takin BJP hnenah an thawh pui rinawm tak an nih avanga duhsak an phuzia a sawi ngam a ni.
He lehkha hi a lem (fake) a nih si loh chuan MNF hi BJP ṭhian, BJP thawhpui leh BJP nena ṭang dun tihna a ni a, chu chu kan ruling party hian an pha thei lovang. BJP thawhpui ni bawk si, BJP thawhpui lo anga lan tum si hi a hahthlak hmel ngawt mai, a chhan chu CAB buaipui lai pawh khan kan MNF bawk khan a tawp thlenga an do tur thu an au pui kha BJP-in an pass luih chuan a ni lo lamah an ṭang ta thên a, insawithiamna chu a awm thei tehmeuh chungin mipui rilru lamah thiam an chang zui lovang tih a hlauhawm khawp mai.
BJP leh MNF inkar boruak han thlir thuak hi chuan a ril zawka inzawmna nghet tak nei chunga pawn lang lama inbauh der mai hi an ang ṭhin a. BJP lalna ram NDA-a an rinawm thu MNF-in an sawi lang hi BJP nen an inzawmna an puan chhuahna a ni a, chu chu mipuiin ṭha kan tih leh tih loh chu thuhran ni ta se. India rama political party lian BJP leh Mizoram political party lian MNF hi rei tak thawk dun tawh, inthlawp tlat an ni tih chu thil dik a ni.
- Lalremruata