Ration khul sak versus Electric Bill Discount

Hman deuhah khan he thupui 'Ration khul sak versus Electric Bill Discount' tih hi khawiah emaw ni ka chhiar tawh a, kan politician-ten anmahni hmingṭhat lak tuma mipui min sawp kual dan vel hi chu thil ngeinawm tak chu a va han ti tehlul em!

He lemchanna khawvelah hian lemchang lehzual politician zinga ka tel lo pawh hi ka lawmna ti zualtu a la ni fovang tih pawh ka ringhlel lo a ni.

Han sawi ta phawng phawng mai ila, khatia kan MLA pakhatin retheite retheihna leh a mimal hausakna hmang ṭangkaia ration buhfai a khul sak tur thu a sawi kha idea ṭha tak mai niin ka lo ralkhat thlir ve a. Keia lo ngaih ve dan chuan ration buhfai hi kum khat chhung pawh khul sak se a tlem tham hle a ni.

Cheng nuai 3 pek vek min tiamtu sorkar tan chuan ration buhfai in khel sak mai mai chu thil harsa a ni lovang. Chu ration buhfai khul chu MLA ten an intih hmuh ta sup sup mai a, opposition leh ruling MLA ṭhenkhatin an han ti ve leh ta hlawm bawk a. Engpawhnise kei ai pawha la rethei ve leh chhawng ration an khulhsak turte ka lawmpui tho a ni.

Tichuan han sawi kai ta zel ila, he sorkar vek hian Electric Bill chu nasa takin a ti pung ta mek thung a ni. Electric Bill hi an duh phawt chuan sorkar hian min la peksak (subsidize) ṭhen thei a, tunah hi chuan mirethei retheihna belhchhah a ni zel a ni.

Ration hi min khulsak miah lo se kan MLA te hian mahse Electric Bill hi ti tlem ta zawk se kan lawm ang. Langsar taka ration in khulsak chunga lang lo lama Electric Bill min chhuhsak leh char char si chuan lehlama khawh liam zur zur, leh lama khawh chhuak leh pur pur a ni ringawt mai.

Hei thil hi chu ennawn leh theih se, ration buhfai khulsak chunga Electric Bill tih tlem hlei hlei hi kan duh chu a ni. Covid vangin Aizawla mirethei hi kan ro ngawih ngawih tawh chu a nih si hi.