MIZORAMAH MI HAUSA TAN HLAUHAWM A AWM LO!

Mizoramah hian mi hausa tan engmah hlauhawm a awm lo a, duh thálin dan a bawhchhiat theih vek. Amaherawhchu, hausak hmasak erawh a ngai.

1. Eng ang pawhin damdawi tawlh ruin, khehpuam eng ang mah la, i hausak tâwk phawt chuan i tan hlauh tur engmah Mizoramah a awm lo. Dan leh a kengkawhtute tam zawk chu pawisa hmangin i thunun thei deuh vek ang a, mipuiin an hnualsuat phah miah lo bawk ang che. Politics pawh khel la, mipuiin an thlang tling tho ang che. Pawisa neih chuana awlsam takin Politics ah dinhmun sang takah a awm daih theih. Mizo náwlpui chu sum hmanga ngaihdan thlaksak theih deuh vek an ni si a.

2. Ram, in leh lo i duh duh, Hotel thlengin vaibelchhe télin i lei pawp pawp ang a, an sawi buai deuh leh, "Champhai pa ta a lawm" i ti daih ang. Kum eng emaw zat a vei hnuah i ta chei chauh ang a, i duh leh PAHOSS-te i dil ve daih ang. A ruka sum thianghlim lo hmanga i ram leiah sorkar pawisa hmangin in i sa daih mai dawn a ni. A hlawk dawn em asin!

3. Politics-ah lo hlawh-tlingin, Chief Minister/ Speaker/ Minister hial pawh ni mah la, thuneihna sang tak i neih tawh dawn avangin mi hmingin contract lian pui pui (PMGSY, etc.) i thawk reng ang a, an sawi buai dawn chuan, contractor chu midang daih a nih thu document nen i show leh daih ang. Chu chu hausak chuan a theih tlat.

4. Nupui nei reng chung pawhin i duhzawng apiang nula leh nuthlawite i kawp kual vel reng thei. I hausak phawt chuan hlau duh suh; hausakna hmangin a chinfel vek theih. Uire fo mah la, i kawppuite rilru na ngawih ngawihin awm ṭhin mah se, i hausak phawt chuan an hmeichhiatpui ngei ngeite pawhin an ṭan zawk daih ang che. I thlavang an hauh daih ang.

5. I hausak phawt chuan i duh tawkin mipui sum chu eiru rawh, engmah hlauh tur a awm lo. An sum i eiruksak hmang ngei khan awlsam takin mipui a tihlungawi vek theih. An sum i eisak tih hre reng chungin an VOTE dual dual ang che, i thlavang an hauh dur dur mai ang.

6. Dan i palzut nasat avanga i lo hmingchhe ta deuh a nih pawhin Kohhran leh NGO ho mitmei veng buai duh suh! An programme han sponsor zeuh zeuh la, Kohhranah sawma pakhat hming chhalin nuai eng emaw zat i pe bawk ang a, rawngbawlna chanvo hlu tak an pe nghal ang che, a fel vek mai ang. Kohhranin a duh chu SUM a ni a, a lakluhna thianghlim leh thianghlim loh lam a ngaihtuah ngai lo. Nuai 100 i eiruk thup nan nuai tam sen a ngai miah lo ang.

7. Ṭhalai thangtharhovin "Eiruk hmang, mi ṭha lo," an ti che maw? An pualin football/futsal/badminton/computer games, etc. tournament huaihawt la, zirlai tiṭhate thilpek pe la, infiam mite sponsor la, kum tlem te chhungin i lamah an bet vek ang a, an ngaisang vek tawh mai ang che. Mizo ṭhalai tam zawk chu inhlawh peih lo, thawhchhuah nei mumal lo, sponsor-tu mamawh vek awmkhawm an ni tlat. Football pakhat lek pawhin ṭhalai tam tak a tihlawm theih. In venga Kohhran ṭhalaite pawh kha inhlawhna han siamsak zauh zauh teh, fak i hlawh ang a, vanram kawtchhuahah hmuh ngei che an inring vek ang.

8. Pathian erawh bum tum suh ang che. Pathian chuan i thiltih engkim a hre vek a ni. c/p.

Kamrul chhangte chu ni dangah aw..

- MKA Kawlni