Hâlpuah khapna thupek hi

Mizoram sawrkar chuan kumina Krismas leh kum hlui 2021 thlahna leh kum thar 2022 lawmna atan hâlpuah leh a kaihhnawih chi hrang hrang a khap a, district magistrate hrang hrangte pawhin an district ṭheuha hman turin khapna thupek an chhuah tawh niin a lang.

Hâlpuah leh a kaihhnawih thilte khap hi ka sawisel hauh lo a, a ṭul pawh a ni ang. Ram leh mipui tana thil ṭha zawk a nih phawt chuan khap se, mipui pawhin kan zawm hram hram a ṭha khawp ang.

Ngaihmawhawm zawk leh mipui hmin loh fona ṭhin chu, khap thupek bawhzuina lam a chak lo ṭhin leh thupek bawhchhiate ûm zuina lam a chau-rau mah mah ṭhin hi a ni.

Kumina hâlpuah khapna thupek tihchhuah tawh hnuah Diwali lawm a ni a, chutah chuan Aizawlah ngei kan hnam dang unau, Diwali lawmtute'n hâlpuah an hâl ngei tih hmuh tur a awm a, social media-ah a darh chuai chuai a nih kha. Diwali laia sawrkar thupek zâwm loa hâlpuah hâltute (Assam Rifles mi leh sa an ni mai thei a) thupek kengkawhtute hian an bawhzui rêng em, hrem a ni rêng em?

November 13, 2021 (Inrinni)-a chhuak Vanglaini-ah Aizawl SP Pu C Lalruaia'n press mite a kawm thu leh chutah chuan hâlpuah, hâlmawi, silai lem a mu kâp chhuak thei leh sky lantern-te khapna thupek khauh taka an kalpui a ni tih a sawi thu a chuang a. "Diwali-ah pawh hâlpuah leh hâlmawi hriat tur leh hmuh tur a awm lo. Hmun ṭhenkhata hâlpuah puak zauh awm pawh kan bawhzui nghal a, an hotute pawhin an ûm zui ve nghal a ni," tiin a sawi tih kan hmu.

Diwali-a hâlpuah hâltute man thu leh hrem an nih thu erawh chanchinbuah a lang lo a, Aizawl SP hian a sawi tel lo a ni ngei ang a. Chuti a nih chuan, Diwali-a hâlpuah hâltute chu man an ni lo a, hrem an ni lo bawk, tih hi mipui rilrua awm chu a ni.

Vanglaini-ah vêk, Aizawl SP chuan, "Krismas (2020) leh kum thar (2021) vuakvet liam taah khan hâlpuah leh hâlmawi kaihhnawihah Aizawl district-ah case 22 register a ni a, mi 28 thubuai siamsak a ni," a ti, tih kan chhiar bawk a. Nikum 2020 thlah zan leh kumin 2021 kum thar lawm zana Aizawla hâlpuah hâl a nasat dan ngaihtuahin, sawrkar thupek bawhchhiate an ûm zui ṭha tâwk lo hle tih a lang thei a ni.

Heng zawng zawng hi mipui hian an hre ve kar a. Diwali lawmnaa hâlpuah hâltute hrem loha an chhuah laia Mizote nasa taka inkhuahkhirh bik tumna hi mipuiin an ngaithei vak lo a, mipui hmin lohna leh an phunna ber pawh a ni ṭhin. Kum hmasa lamah pawh khap a ni chunga thupek bawhchhetute hrem an ni ngai mang lo hian mipui a tithuawih lo fo bawk niin a lang.

Chuvangin, sawrkar hian thupek a chhuah a, hâlpuah a khap a nih rau rau chuan khapna thupek chu khauh taka kenkawh ngei ni se; chu chuan a hnu lam zel leh kum dang zela thupek hlawhtlinna leh hlawhchhamna mai bakah, mipui sûkthlêk nasa takin a hruai dawn a ni. Thupekah mipui an hmin loh chuan thupek a hlawhtling tak tak thei lo zu nia!

- Zoramchhana