Revd Chuauṭhuama Doctor of Divinity (DD) dawng tur lawmpui nan, amah ka hmuh leh ka hriat dan

Kum 1996 March ni 1-ah Aizawl Theological College-ah Office Assistant hna thawk turin ka lut ve a, khatih lai khan Lecturer-in a awm a, ka luh tirh kha chuan ka nêl lutuk lo a; mahse amah kha min titlangneltu hmasa kha a ni ve tlat. Ka luh hnu lawk, April thlaah, Dedication cum Farewell kan nei a, chumi ni chuan Lace kawr Purple ka ha a, "Khawi nge, i thla ka lo lak ang che," a ti a; tun thleng hian kha thlalak kha ka la dah ṭha char char a. Khata ṭang khan ka nel ta khawp mai a. Thawktute Faculty ni lo Office Staff-ho pawh min titipui peih leh, a âwl chânga Office-a lo lut tam pawl tak a ni a. Hun a lo Kal zêl a. ATC Registrar hna a lo chelh takah chuan, Academic kha kan pahnihin kan enkawl dun ṭhin a; min support ṭhain, tihtur nei miah lo mah se, zân awm tlai a ngaih pawhin a Room-ah hnathawh pahin min lo awmpui ngat ngat ṭhin a. Room inbang dan, inbiak phak vek a ni chungin a khât tawkin, min rawn ngaichang reng a, a changin min tibuai si lovin a lo titi a, min uap hneh khawp mai. Eng emaw damlohna leh chhungkaw thil pawimawhah chawlh min pek a ui ngai lo a, min hrethiam em em a. Ka hnathawh hi zirlai thil engkim, Application Form an rawn lak aṭanga an zir chhuah thleng, chu'ng zawng zawngah chuan, min thlâwpna hi a ropui ka ti ṭhin. Mihring famkim lo kan ni a, thil tihsual leh eng emaw tih dik tâwk lohte ka lo nei ve nasa a, chungah pawh vawi khat mah ka rilru natna turin a ṭawng ka hre ngai lo, ka tih dik loh leh tihsual pawh ṭha takin, min hrilh ṭhin. Chu mai a ni lo, Pi PC Tlani phei chuan, "I Pu Chuaua hi engtin nge i tih bik? A bulah tu mahin an sawi chhe thei lo che, a lo thup mawi zung zung che," min ti hial ṭhin. A fanu Elsa-i MBBS a zir laite khân, a exam dawn te, harsatna a tawh te hian Live-in a ṭawngṭaisak ṭhin hi vawi tam ka hria. Ngaihthlak nuam hi ka ti a, a rûkin ka lo ngaithla zeuh zeuh.

Kan inhrawn chhung khan Pa leh Pu ang hian ka en tawp a, tun thleng pawhin a la ni tho. Harsatna ka tawh reng reng hian a hnenah hian ka sawi vat a, a chang chuan hnukulh ṭeuh leh ṭap zawih zawiha biak changte ka nei ṭhin. Chu'ng hunah chuan ka tân Pa leh Pu nih hi a tling em em ṭhin a.

A taimakzia leh hna a thawh nasatzia avang khan ka ngaisang a. Computer keyboard te kha a hmang nasa lutuk a, a ziak hi a reh zung zung ni mai hian ka hre ṭhin. A khûp ruh a sawh keh ṭum pawhin damdawi inah a awm a, a lehkhabu ziah lai, proof-reading a tih lai mêk kha, "Lo thawn phei ang che, min zai zawh hnu chuan tihtur ka nei dawn hlei nem," a ti a; mahse khatih laia Kan Principal Rev. Dr. H. Vanlalauva khan, "Thawn hlek suh, a dam chian hma chuan," a ti a; a tirah ka thawn phei lo a, a hnu deuhah chuan ka thawn phei ta tho a. Staff reng reng hian kan ngaina a; Zirlai chhuak tawhteho lah hian an ngaisang. A lehkhabu ziah a nih hrim hrim tawh chuan lei ngei ngei tum bur ang chi hi an tam khawp mai; mit ngeiin ka hmu ṭhin. Pastor ṭhenkhat an lo luh hlima a zia la hre chiang lo hian an tâwng zeuh zeuh a; mahse a zia an han hrechiang a, an nêlin an ngaina leh êm em thung a. Mi dik leh ṭha taka awm tân hian Pu Chuaua hi eng lai mahin mi hnawksak a ni ngai lo.

Class a la te kha, Hebrai Alphabet te kha corridor-ah te khan a sawi phei zuah zuah ṭhin a. Zirlai an tam emaw tlêm emaw a awki a ngai reng a; BCS leh DCS class te hi a la ṭhin a; ṭum khat Inrinni hian Dip. CS zirlai pakhat chiah tuna Tlabung Pastor ni ta, Jessie Zosangliana hi amah chauhin a la a, room chung berah kei room hnuai berah hna ka lo thawk a; a thusawi kha ka hre vek a, a lo chhuk hnuin, "Eng zat em em nge a, i va ṭawng ring em em ve," ka lo ti a, "Pakhat chiah, tlem mah se zirlai a pawimawh dan a inang reng a lawm," a ti a, kan nui nasa mai a.

Vawi khat leh Rev. C. Lalbiakhlunate BD rawn zir leh khan Exam Form kan fill-up pui a, Pu Biakhluna tlar hmasa berah a ṭhu a, Pu Chuaua'n ring mangkhengin form fill up dan tur kha a hrilhfiah a, a sawi zo chiah a, Pu Biakhluna'n, "Sir, engtin maw?" a ti a. Pu Chuaua'n, "Lu lian nazawngah hian thluak a tam lo a nih hi," a ti a, an nui dur dur a. Pu Biakhluna lahin, "A ring nazawng hi hriat a nuam kher lo," a ti a, kan vaiin kan nui leh ta hum hum a; khami ṭum pawh khan Pu Chuaua kha, a nui nasa ber berah a ṭang tho. Khami te Class-ho nen phei kha chuan an innel zual a; Class-ah Wrestling chanchinte an sawi a, an nui thûm hluah hluah ṭhin.

Computer a thiam tirh lam khan Beginner Zirlaibu ziak turin an ruat a; a ziak ngat ngat a, ṭum khat Zirtawpni chawhnuin, Kohhranin an sawm avanga a tuka zin chhuak tur a ni a, chawhnu lamah chuan, "Ka ziah zawh loh tlem hi ka zu ziak zo ang e, min mamawh an awm chuan, min lo phone mai rawh u," a ti a. Dar 2:30 vel bawr niin ka hria, "Lo chhuk teh, a bo vek," a rawn ti ta mai! A nupui Nu Chhumi hi bengvar zet leh fel êm em mai hi a ni a, ka zu chhuk a. Pagemaker-a a thu chhut kha, a lo highlight vek a, delete a lo hmet palh a, a close tur kha save i duh em tihah khan, 'yes' kha a lo click laklawh bawk si, 'no' ti se chu a bo lo tur a ni a, mahse tihngaihna a awm tawh si lo a, tunlai hun ang chu ni se, recover a har ka ring lo. Mahse hun tepter eng angah pawh a hun takah a ziak zo leh thei mai a. A taimain a sincere a, kum upa lama computer khawih ve chauh a ni chung khan, a thiam zung zung mai a; a lehkhabu chhuah tur reng reng pawh amahin setting zawng zawng pawh a khawih thei vek a, a intodelh em em bawk a ni.

Chuan, eng lai pawh hian a smart hlarh reng mai a, college office-ah hian vawi khat chiah chappal nena a awm hi ka hmu. A nupui Nu Chhumi leh amah pawh an felin an taima hle tih a hriat a ni.

Tichuan, lehkhabu tam tak a ziak a, ka sawi tawh ang khân a lehkhabu reng reng hi hralh a kal bik riau. A pension hnua a rawn thawh leh zawk laite khân, kan zirlaite'n ka bula an sawi tam ber chu, "Sir Chuaua zirtir ka ni ve hrim hrim pawh hi ka inchhuang khawp mai, ka lawm em em bawk," an ti ṭhin.

College ni pawimawh reng rengin Khualchhawnah hian a ṭang ṭhin a, a hnehsawhin mi ṭawng tam em em ni si lo, mikhualte lo chiauau hi a thiam êm em bawk a, a rawn thawh tawh loh hnu hian, hetiang function pawimawhah hian ka hre chhuak fo ṭhin.

Registrar a nih avangin Pathian thu zir tur an lak dawn hian written neih zawhah, Theological Education Board-in interview tûr an thlang leh ṭhin a, khatiang hunah khan Canteen-ah ei tur an buatsaih ṭhin a; Board Member te leh rawn hruaitu Driver te leh keini Academic-a thawk te tân, kha'ngte khan kan ei loh leh kan inthlahrun hlau hian vawi tam min rawn hrilh ṭhin a, a chang chuan zan dar 10 pelh chângte kan nei ṭhin; an Committee bang zirlai lak tharte List siam a ngaih ṭhin avangin, midang chuan chaw an lo ei mai ṭhin. Kha'ngte khan kan inpeih hma chu min nghak ngat ngat peih a, Kan inpeih tlai leh a ei tlai ṭhin. Ka tân chuan Pa/Pu nih a tling takzet.

Eng Kohhran pawh zirtirna dik lo chungchangah buai se, a chin felpui ṭhin; khatiang atan khan Synod lam aṭang khan an ruat ṭhin.

Tam takin Liberal viau anga an hmuh hi kei chuan, ka hmu ve lo, a thlarau mi ka ti tlat. Kan thawhpuite zingah harsa deuh awm se, thawmhnaw a hak miah lohte hi an awm loh hlanin an dawhkanah te a lo dah a, "I duh leh pek àwm i tih deuhte lo pe ṭhen ve rawh," tih te a lo ziak ṭhin. Library-a daily-a lo thawk pakhat fahrah ve deuh pasal nei tur pawh, a chhun chawlh laiin Envelope-ah, pawisa ṭhahem tak mai a lo dah a, "I mamawha hman atan," tiin a ziak a, khami ṭuma kan lawmpui lutuk kha, hnukte pawh a ulh hial thei. Chuan zirlai harsa hi a tuam hlawm hnem khawp mai, mahse tu m'a hriat a duh ngai lo, mahse ka hre ṭeuh.

Old Testament lam a nih avangin, ama zirtir chhuakho, Dr. Rosy Zoramthangi, Rev. Dr. F. H. Liansangzuala, Rev. Dr. Lalawmpuia Hauhnar ten Doctorate Degree an han dawng chiah chu, 'Zirnaa ka fa hrin' tiin a lawmpui thiam êm em a, hetianga mahni zirlaite hmangaih leh lawmpui thiam hi an awm pawh ka ring tawh lo. Ama fa hrin Doctorate Degree dawng ang hrimin a lawmpui thiam.

Bible Encyclopedia a ziah ṭum kha niin ka hria, Synod Inkhawmpui Chanmari-a neih a nih ṭum khân Kohhran Upa pakhat a lo kal a, ATC Counter-ah, "Pu Chuaua Bible ziah kha in nei em?" a rawn ti a, kan lo hrethiam ve mai bawk a. Amah hrim hrim hi mi zakzum tak leh fiamthu duh em em mai a ni a, a nèlte bulah hi chuan fiamthu han sawi maite pawh a hreh lo. Ring deuh deuha a ṭawng chhan pawh hi a zahzum vâng niin ka hria, mi a biak hian a mit ṭhat loh chu thu hran, an mitah hian a en ngai vak loin ka hria.

Hetiang mi a nih avang hian kei chuan, hman aṭang tawh khan Doctor of Divinity (DD) hi ka lo beiseipui ṭhin a, chuan ka lawmpui takzet a ni e.

- Apuii Tlau