TWOWHEELER TAXI PERMIT KAN DUH VE THO?
Tun sawrkarin twowheeler taxi permit a pe chhuak dawn nia sawi a awm tirh (nikum eng thla chiah nge ka hre ta lo) khan, dil ve turin department lamah rang takin ka kal a, office lamin minlo chhanna khan ka rilru a tina hle. "Ka zep buai vel lo mai ang. Hnam Rûn atangin permit pek chhuah tur zat leh a dawng tur list kan dawng daih tawh", tiin lawm vak biklo hmel pu chung khan min lo chhang kha a ni a, bei a dawng duh hle. A hnu deuhah nuai khat leh sing thumin miin min lei chhawntir a, tun thleng hian Pathian zarah chhungkaw tan a tangkai hle.
Tunah hian twowheeler taxi hi 2000 chuang daih kan lo awm ta a, intlanchhawk loh chuan tihngaihna awm lo a ni tawp mai. Kar khatah vawi 3 kan tlan tlangpui a, vanneih changin vawi 4 tlan a awm zeuh thin. Ni khatah fuel man paihin Rs 1000 vel hi chu harsa takin kan la hlawh ve thei mai a, a lawmawm phian (mahni ta khalhin). Vanduai tum erawh chuan kan hawi lel lel ringawt tawh mai thin.
Ni khata Rs 1000 kan hlawh hian, a tukah kan awl leh thin avangin a nihna takah chuan ni khatah Rs 500 kan hlawh tihna a ni. Hei hi mahni ta ka khalh ve leh zeuh thin changa ka nih dan a ni a, mi ta khalh phei hi chu a ruk tak hian ka khawngaih ve lehchhawng rum rum thin. Aizawl khawpui, khawsak hautak em emna hmunah kan lo awm ve tawh laklawh si a, ni khata Rs 500 emaw a aia tlem lalut chunga chhungkaw enkawl hi, thil theih loh tluk a ni. Mi ta khalh chunga chhungkaw enkawl phei chu ka suangtuah ngam chiah lo. Chutiang chu twowheeler taxi khalhtu tam takte dinhmun hi a ni asin.
'Nangnin in duh ang tho khan mi pawn an duh ve alawm' tih te, 'midangin an nei ve tur thik tlat mai chu ava rilru chhiatthlak ve' tih te, tawngkam chhe tak tak hmanga twowheeler taxi hmanga eizawngtute diriamna comments tam tak chhiar sen loh ka hmuh hian ka rilru a tina hle. Congress sawrkar khan permit 500 bawr vel a pek chhuah khan, chhungkaw chawmna tak tak atan a hmantlak a, chhungkaw 500 hnenah twowheeler taxi hmangin eizawnna tha tak (employment) a siamsak hman kha a ni a. Tun MNF sawrkarin 2000 dawn permit thar an pek chhuah takah khan, eizawnna tha tak kha suasamin a awm ta a, tunah zet chuan side income atan bak a tlak meuh tawh loh chu a ni ber. Chu side income atana tawk vel chu mi tam tak main income atana hmang hi kan la awm a ni.
Awle, ATTA ho hmalakna, permit pek chhuah belh tumna awm nia hriat duh lohna lantir chungchang post hrang hrangah, na taka i comment dawn chiah khan heti hian ilo ngaihtuah chhin phawt dawn nia, "Kei hi chhungkaw chawmtu ber ka ni a, twowheeler taxi hi ka eizawnna ber a ni," tiin mahni chanah ilo indah chhin phawt tawh dawn nia. Tute emaw side income atan leh pocket money hlawh chhuahna atana hmang ho ringawt kha va tinzawn tawh lovin, chhungkaw chawmna tak tak atana hmang ho kha ilo ngaihtuah tel ve thin tawh dawn nia aw. Tuna permit pek chhuah belh tumna hian employment a generate dawn lo va, employment (employment tia koh tlak pawh a ni tawh lo zawk mah awm e) awm sa kha rawn thiatin a rawn suasam zawk dawn tihna a ni. Thil pakhat leh chu, twowheeler taxi a tam hian a rate a hniam phahin ka ring lo va, tlanna a vân tawh dawn em avangin a sang zawk hial angem aw tih hi ka ngaihtuahnaah a lo lut ve mek bawk. Chuvangin, kan sawrkar hian Aizawl khawpui atan bik chuan twowheeler taxi permit hi pek chhuah belh tawh lo hram teh se.
WE SUPPORT EMPLOYMENT GENERATION, BUT NOT DEGENERATION.
- J Lalnunzira