Engtin nge Lal Isua kan zui ang?
Kristian kan niha Lal Isua kan rin hian mawhphurhna leh tihtur a keng tel nghal a. Chung kan tihtur leh kan rawngbawl dan tur te, a hnung kan zui dan turte chu Lal Isua hian Chanchin Ṭha bu-ah te hian chiang takin min hrilh a. Chanchin Ṭha ziaktute'n Lal Isua leh a zirtirte chungchang sawina atana thumal an hman ṭhin 'zui' (Greek- akoloutheo) tih hi Lal Isua hnen aṭanga thil zir tura zui tihna a ni. Lal Isua duhzawng, ngaihtuah zawng, thil thlir dan, a duh loh zawng leh engkim huam tura amah zui tihna a ni.
Tunlai Kristian nun hman mek ah hian Lal Isua min phut ang leh beisei ang hian a hnung hi kan zui em? Matthaia 10:34-39 kan en chuan Lal Isua'n khawvela a lo kal chhan leh a hnung kan zui dan tur min hrilh a. Chu chu kan tihlawhtling em le?
Lal Isua kha Juda te khan remna leh muanna lo thlentu tur niin an beisei (Zak 9:9-10). Mahse Lal Isua chuan, "Khawvelah hian rem lentir tura lo kal emaw min ti suh u" tiin an beiseina dik lo chu chiang takin a hrilh fiah a. Keini a hnungzuitute hian engkim huama kan zui a ngai.
Bung 10:37- ah keini Lal Isua zuitute hian kan nunah kan nupui pasal fanau, a tawi zawnga kan chhungkua aiin Lal Isua hi kan dah pawimawh tur a ni tih min hrilh.
Kan chhungkaw inngeih lohna vang te, sual hnathawhin kan chhungkaw nun a tihbuai avang te a chau leh tlu mai loa amah dah pawimawh ber turin Lal Isua'n min ziritir in min fuih a ni. Kan in chhung boruakin a zir loh vang te leh kan chungkua kan hmangaih vang zawk a Lal Isua hnawl hi kan tih tur a ni lo tih kan hre chiang hle awm e. Lal Isua kan zuina dal thei tur laka fihlim turin min duh a ni. Kan nunah hian Lal Isua hnung kan zuina tura min dal mektu hi eng nge ni ve ang le? Tin, Lal Isua'n nitin a keimahni kraws pua zui turin min duh a ni.
A tawp berah chuan kan nunna chan ngam khawpa zui turin Lal Isua'n min phut a ni. Khawilaiah emaw hlauhawm leh phur rit lo thlena pen bo san mai mai turin Lal Isua hian min duh lo. Kan zui Lal Isua hian he khawvel lang thei lamah hian in bengbel a, awm turin min ti lo a, chatuan nunna chu thlir zawk tlat turin min duh a ni.
Kan sawi tak aṭang khian Lal Isua kan zui dan tur chu kan hre chiang nawn awm e. Kan tunlai khawvel changkang tawh lutukah hian Lal Isua aia thlan zawk tur thil hi kan mut hmunah, kan room-ah, kan phone-ah hian a awm tawh a. Chu chu Setana hian ṭangkai taka hmana Lal Isua kan zuina lakah hian min hruai bo a tum mek a, min hruai bo mek bawk.
Kan bo hlen lohna tur leh Lal Isua zuitu rinawm kan nih zel theihna turin Lal Isua'n a thu min chah te, tih leh tih loh tur min hrilh te hi ngaihtuah ngun ila. Kan khawvel lo changkang zelin min hruai bo theihna lak ata inthiarfihlim a, Lal Isua hnung zuitu rinawm ni tur hian kan theihtawp i chhuah thar leh ang u.
- Rinfela Zadeng