Zoramin hma a sawn har

Kum 1972 ah UT-a hlan kai kan ni a, kan ram roreltu MLA kan thlang a. Chu mi hnu-ah State-a hlan kai kan ni. Kan ram hruaituten mi nuai sawm lek an enkawl a, mah se kan ṭhhan dan hi ngun taka kan chhut duh chuan nau piangsual ang lek kan ni a tih theih. Ke lam ṭhang lo lû chauh ṭhang ang chauh kan ni. Aizawl khawpuiah motor a tam hlur a, khaw dang han pan ila, motor tawh tur a khat pharh ṭhin.

Engvang nge, kan tih chuan kut hna thawktute thar chhuah state danga hralh tur kan nei mumal meuh lo.

A chang chuan sawhthing kan han sawi dawn dek dek a, a hralhna mumal lovin a zuih ral leh mai ṭhin. Congress-in kum tam tak ro an rel tawh, MNF pawhin kum 10 chuang, Pu Laldenga hun lai nen chhut chuan an rel. Vawiinah hian kan hmasawnna, mipui eizawnna bîk chhût chuan hmuh tur engmah a awm lo. Engmah a awm lova, engmah a awm thlawt lo. Enga tinge, hetiang em ema hma kan sawn theih loh, tunge mawh phur, roreltute an ni lo em ni? Zoram kut hnathawktute hi tuiah kan tla pil vawng vawng a, min hma­ngaih a, min khai chhuaktu kan nei thlawt lo a ni ber.

Kawmthlang pa ar vulh kawmchhak pain a lei a, a ṭha e, a pawimawh ber zawkah chuan Vai­rengte pela state dang sum lak luh a pawimawh ber zawk.

Kan ram hruaitute hian state dang emaw India ram pawnah, vawi eng zat nge, kan ram mipui za zela 70 eizawnna buaipui hian an kal chhuah tawh ang. Lo kal chhuak ni se, eng thil nge an hmuh chhuah, an lo hmu chhuak a nih chuan eng chen nge hma an lak tawh.

Inthlan dawn chauha ram hmangaih anga insawi fo hi a khamawm tawhin ka hria. Kristian state tia mi sawi hi state dang aia ṭhang duang zawk tur leh an entawn zawk tur kan ni dawn lawm ni? Nge Kristian state hi state dang aia hnufual reng tur kan ni zawk em ni?

- Vanlalsiama Fanai