BJP hi kan hlau tak tak em?

India ram zau takah hian BJP hian state tam zawkah ro an rel mek a, kei ni India hmarchhak lamah pawh kua an hreuh thuk ta viau mai. Tripura state leh Assam state-ah chuan anmahni pawhin sorkarna an siam thei chu a ni ta der mai a, Manipur, Nagaland, Arunachal leh Meghalaya-ah pawh sorkar lamah an ṭang ta der mai a! Mizoram hi inthlang tur kan ni a, kan him bik ang em?

Hmanni lawka kan state chhung Auto­nomous District pa­khata inthlannaah khan a member nei tlem ber ni siin BJP kha sorkarna siamtu an ni ta mai a. Kan inthlang tur pawh hi ngaihtuah a tithui duh khawp ta mai.

ADC inthlanah khan MNF emaw INC emaw khan BJP puihnain sorkarna a siam ngei ka lo ring a. MNF kha chuan tlang takin BJP nena thawk dun a, sorkarna chu a party-ina siam tur ang khan sawi a ni a. Congress khan a tling tam zawk ni siin BJP kha sorkarna a siam tir ta maiin, a thlawptuah a ṭang ta then mai a, a mak kher mai! Mumang lama pawha thleng thei lo tura kan lo ruat ṭhin kha INC khan a thlen tir ta a nia! Khatiang a nih tawh hnuah pawh INC hotupa lah khan “Buddhist BJP-te chu an tlem em a, an hlauhawm loh” te ala ti ta deuh deuh nen!

A reng reng thuin Bhuddist BJP hi an awm hran ve em maw ni le? CADC a BJP lahin an zawmpui leh an kung pui ber chu Delhi BJP, Pu Amit Shaha hruai khu a ni tho bawk si a, tih laia kei nin BJP kan lo thliar hrang ve ngawt hi a fuh ber ang em? Kha inthlan campaign lai ngei pawh khan BJP hlauhawmzia te chu kan hotute khan an sawi cham chi kha a ni si a? Inthlan an zova lo chak loh takah rorelna fung vuantu lama ṭan duh vanga Buddhist BJP hlauhawm loh thu kan han chhak chhuak leh duh ta mai kha chu hriat thiam a har ta deuh a ni.

Khatianga sawi ai chuan, “BJP hmaah dawl zawrin kan zawr a ni ber e,” tih mai hi a fuh zawk awm e. Congress kha seat la tam ber dawttu ni siin rorelna fawng vuan turin BJP an papek daih a. Hetiang a nih chuan inthlan pawh kan han nei mah anga BJP hi an tling ve a nih chuan seat hnih khat lek pawh la se an sorkar thei mai awm asin le!

Congress dinhmun chu kan hre chiang ta. ZPM hi engnge a an ve tih erawh kan la hre lo a, a la puan hnuai thil deuhva, anni hi chuan BJP hi chu an duh lo bur turah lo ring phawt mai ila. Kan sakhaw himna tur hi chu an ngaihtuah ve ngei turah ngai phawt mai ila.

PRISM lah ni se BJP chu ral do taka do bur mai an nih hmel a. MNF pawh kan hre chiang tawh a, BJP chu NDA-a an thawhpui ni mah sela a tlem zawk an nih phawt chuan an hnuaia kun an tum hmel loh tih a lang chiang tawh. Kan sawi anga BJP hi sakhaw tih bik nei run mai an lo ni a nih hlauh pawhin a do ngam tur chu PRISM, MNF leh ZPM-te hi an ni ngei ang.

Chuvangin, tun inthlan turah pawh hian sakhaw zalenna duh kan nih rau rau chuan he party pathumte hi tih len tuma ṭan lak mai hi a fuh hmel viau awm e. BJP hi kan hlau a nih rau rau si chuan Buddhist BJP, Kristian BJP, Hindu BJP tia thliar kan tum chhung chuan kan zirlai chap­ter-ah kan chiang lo tih hriat a hun.

- Patrick Z, Chhingchhip