SKY WALK LEH ROPE WAY HLAMZUIH CHUNGCHANG HI, POLITIC INBEIHNA TUR A NI LO.
Kum 2017 October thla aṭanga pawisa sanction tawh leh thla 16 chhunga zawh hman tura ruahman sawrkar laipui fully funded project (Swadesh Darshan project, phase 11) hnuaia hnathawh tur Component 10 zet awm zingah Chaltlang to Durtlang (Rope Way) leh Sakawrhmuituai to Lungdai (Sky Walk) hnathawhna tur sum cheng nuai 1300 zet pek an ni tawh chungin, MS Joint Venture NEIP, Ropeways & Resort Pvt Ltd (No 302, Hum Sab, Apartment Sector 4, Plot 14 Dwarka, New Delhi 110075) te chuan tun thlengin hna an thawh chhunzawm lo va, he thilah hian Tourism Minister Pu Robert Romawia Royte chuan Tuirial bial by election Campaign laiin Congress party beihna nia ngaih theih in, CBI chhuitir tum a nih thu Lungdai Public meeting ah a sawi nain, tun hnai khan MNF Legal board lam chuan Mizoram Lok Aiyukta lamah FIR an thehlut hlauh thung.
India ram hi Tourist destination nei ṭha tak a ni. Ancient India hun laia Historical Monuments tam takte bakah, khualzin hip thei tur dang siam belhna project Swaresh Darshan chu kum 2015 khan Prime Minister Pu Narendra Modi chuan Ministry of Tourism Govt of India hnuaia kalpui turin a hawng a, sum ṭhahnem tak kum tin dah ṭhin niin, tun hnaia Mizorama Sky Walk leh Rope Way Project te pawh hi he Swaresh Darshan khurpui sum hmanga siam tur an ni hlawm.
He Swaresh Darshan hi India rama khualzinte tlawh tur hmun siam belha tih changtlunna tura sawrkar laipui project niin India state zinga Tourist destination nei ṭha apiangin Project /DPR siama sum an hnuhluh mai theihna tura duan a ni a, chumi zulzui ang chuan tuna project kan sawi mekte pawh hi Empannel firm-ten hmun hrang hrangah an thawk mai ṭhin a ni.
Mizorama Sky Walk leh Rope Way siam tur pawh hi sawrkar anga dil leh buaipui chiam ngai a ni lo va, MS JV NEIP-ho hian Ministry of Tourism aṭangin engkim an buaipui vek zawk a, Mizoram sawrkar hi chu malsawmna lo dawngtu ringawt a ni ber.
Mizote hi kan politics buaipui dan fuh lo avangin, thil tluangtlam tak pawh hi kan inpuhmawh chiam ṭhin a, heng Sky Walk leh Rope Way siam tur pamṭul thuah hian Congress sawrkar liam ta emaw, MNF sawrkar emaw hian mawhphurhna a nei hran lo va, he project rawn buaipuitu MS JV NEIP, Rope Way & Resort Pvt Ltd New Delhi te hian mawh engkim an phur zawk tih maite hi he thil chungchanga thudik chu a ni e.
A pawngpawrh thei ang bera, CBI chhui kan cho tihte hi a chuangtlai khawp mai. CBI emaw Lok Aiyukta emaw pawh hian chhui se, tu sawrkar hnu pawr mah phawrh mualphoa hmuhchhuah tur an neih a rinawm loh. A nihna takah chuan, sawrkar laipui Tourism policy chhawr ṭangkai turin JV NEIP te hian Mizoram sawrkar hnuaia Society pakhat (MTDA - Mizoram Tourism Developement Authority) an rawn thawhpui mai zawk a ni. An intiamna anga hna an thawk zo lo a nih chuan, Central sawrkar leh Mizo mipuite hi an chunga lungawi lo tur chu kan ni a, party leh sawrkar inbeihna tur chi niin a lang lo. Tuna Lok Aiyukta lama FIR thehluh thu pawh hi party lam ni lovin Civil Society lam tihtur ni zawk awm tak a ni.
- Vanlalhuma Kawlni