House chhunga MLA-te ka hmuh dan

7th Legislative Assembly of Mizoram term chhunga session hnuhnung ber chu June 28, 2018 khan a ṭiak a, speaker Hiphei chuan tlai dar 3:20-ah session a ti tawp. Kan MLA nilai mekte hi an term chhungin vawi 16 an session-a, dan 48 an pass.

Kan MLA-te hi dan siamtu tur an ni a, dan an siamna hmun Assembly House-a an perfomance hi MLA ṭha leh ṭha lo tehna atana thil pawimawh tak a ni lo thei lo. Assembly House-ah hian dan siam a nih mai bakah, thil pawimawh chi hrang hrang ngaihtuaha sawiho ṭhin a ni.

Chuvangin, MLA tan chuan session hi thil pawimawh tawp khawk a ni a, dan anga tel tawp loa uluk taka inbuatsaih chunga telna chi a ni. A hming maia session-a tel ṭhin MLA kan nih chuan, MLA kan nih chhanah kan chiang lo tihna a ni ang.

Session-ah hian minister-te hnenah thil pawimawh hrang hrang zawh a ni ṭhin a, chuta an chhanna aṭang chuan minister inbuatsaih ṭha leh ṭha lo bakah an department chanchin hrechiang leh chiang lo a hriat theih ṭhin.

MLA zingah pawh an zawhna siam dan aṭang leh bill, demand, resolution etc. sawiho ṭuma an thusawi aṭangin session atana an inbuatsaih ṭhat leh ṭhat loh a lang chiang ṭhin hle.

MLA-te'n zawhna an han zawt a, a hma daiha zawhna lut a nih avangin minister-te chuan chhanna an neih sa vek. Zawhbelhna a awm chiah hian minister-te dinhmun a lang chiang ṭhin. Kan minister zingah Pu Zodintluanga, Pu PC Lalthanliana leh Pu C Ngunlianchunga an fakawm viauin ka hria, an department chana zawhbelhna a tam pawhin an talbuai lem lo.

Minister ṭhenkhat chu zawhbelhna a awmin an talbuai deuh nghal ṭhin. 'Ka lo inbuatsaih loh lam a nia', 'Session chhung ngeiin chhana inpek hman kan tum dawn nia' etc. sawi ngun lutuk minister ho hi chu an department chan an chiang tawk loah ka ngai. An department chan an chian loh miau chuan hnathawh ṭhat a har viauin ka ring.

Opposition trio - Pu Lalruatkima, Dr. K Beichhua leh Pu Lalrinawmate an fakawm tak zet. Anni pathum hi session atan an inbuatsaih ṭha tih a lang chiang ṭhin hle. Sawi tawh angin zawhna chu a hma daiha an hmu lawk avangin minister-te'n a chhanna an nei sa vek a, zawhbelhna hi a pawimawh lai tak a ni a, chumi atan chuan opposition trio-te hi an inbuatsaih ṭha ṭhin tih a chiang.

Sawiho tur hrang hrang sawihonaah pawh opposition trio ho an inbuatsaih ṭha tih a lang chiang ṭhin hle. Famkim tawk lo leh ṭha tawk lo nia an hriat laite chiang tak, awmze nei takin an sawi chhuak ṭhin, hemi kawngah hian rulling MLA lamah chuan Dr. Ngurdingliana pawh hi a fakawm ka ti. MLA tam zawk hi chu sawi loh ai sawi ve hrim hrim tum an ang lek lek zel.

Tin, MLA ṭhenkhat zawhna zawh duh dan hi chu a ramhlui zia viauin ka hria. Ka hmuh dan chuan ramhlui zia deuh deuha zawhna zawh ching hi rulling MLA lamah an awm nual. House zahawm taka politics-a inbeihna lam hawi ran zawhna zawh ṭhin hi ṭhangtharte chuan tunlai ṭawng takin 'A ṭhing' kan ti. Tin, pute a tlawn a ni maw tih ngaihbelh theih tura zawhna zawh ching pawh an awm a, session en ṭhin chuan tute nge ka sawi ngai loin in hriat ka ring.

MLA-te hi bial mipuite thlan tlin vek an ni a, bial tana ṭhahnemngai tur an ni teh meuh mai. Mah se, session apianga mahni bial bil ngawr ngawr atan ringawta zawhna zawt ṭhinte hi chu MLA ṭha tia sawi chiah keichuan ka ngai lo. MLA-te chuan bial tan ṭhahnem an ngaiin, an bial tan zawhna pawh an siam tur a ni teh meuh mai, mahse ram pum huap ngaihtuah lek loa bial bil tan ringawta zawhna siam ṭhin hi chu sim a hun viauin ka hria.

House leader Pu Lal Thanhawla a fakawm hlein ka hria, session a ngai pawimawh takzet tih a hriat theih. 7th Legislative Assembly of Mizoram-a member-te mai ni lo, Mizoramah chuan a ni aia MLA ni rei awm loa, a kum pawh a tam tawh. Chuti chung chuan session a ṭhulh ngai mang loa, a tawp a thlen pui peih zel. Kan ram tana thil pawimawh tawp relna hun session ngai pawimawh House Leader kan nei hi a lawmawm takzet a ni.

Mah se, House Leader ka sawisel duhna chu member-te zawhna a ngai pawimawh tawk lo em aw tih turin zawhna a chhang fo ṭhin hi a ni. A bik takin eptu MLA-te zawhna hi a chhang pial lui deuh em aw ka ti fo.

Eptu lam leader Pu Vanlalzawma hi mi nungchang zawi tak a ni tih House-a a chetdan aṭang hian a lang chiang. Mah se, Eptu Leader ber hi House-ah hian a ṭang tawk lo em aw ka ti ṭhin. A chunga ka sawi tawh opposition trio ho kha Eptu Leader hian han thlawp ṭhain, han pui ṭha lehzual se chuan session a ngaihnawmin, ram tan a hlawk lehzual a ngem aw ka ti ṭhin.

Chutihrual erawh chuan sorkar sawisel a ṭul huna sawisel hreh lo, sorkar fak an ṭul pawha fak hreh lo, nungchang entawn tlak tak Eptu Leader kan nei tih erawh hmuh hmaih chi a ni lo ang.

A khaikhawmna atan chuan 7th Legis­lative Assembly of Mizoram-a member-te House chhunga an chezia a hmuhnawm hle. Ṭul lo leh sawtna awm miah lo tura inhnial buai vak vak te, House rorel thei loa tihbuai luih ṭal tumte leh tharum thawh duh an awmlote hi thil lawmawm tak a ni. Hmun tam takah chuan rorel thei loin House a awm ṭhin a, a tuartu chu ram leh mipuite an ni.

Member-te'n session an ngai pawimawh tlang viauin a lang a, damlohna thil leh thil pawimawh bikah tih loh chuan an kal ṭha ṭhin viau.

Session tawp ber nia House Leader-in eptu MLA-te an fak te, Eptu Leader-in House Leader a fak bakah rulling MLA an fakte kha a va ngaihnawm em. Khatiang kha khawvel hmun dangah a awm ve a ngem le? MLA lo la ni zel turte pawhin MLA lo ni tawhte House chhunga an chetdan entawn se, tihdik tawk lo an neihte a awm a nih chuan entawn loin, siamṭha thung se kan ram leh hnam tan a va ṭha dawn tak em.

- Malsawmdawngzela Hrahsel