Fur laiin i fimkhur ang u

Furpui kan thleng chho leh ta a, he hunah hian khuarel chhiatna ni lo, mihringin kan siamchawp chhiatna a thleng duh hle. He hun­ah hian mi tin kan fim­khur a ngai khawp mai.

Mihringin chhiatna kan tawh tam ber chu kan fimkhur loh vang a ni. Kan in sakna hmun a him leh him loh ngaihtuah lem loin kan sa pawp a, a leilung awm dan zirchianna a awm tawh ṭhin si lo a, hei hian in chim a siam tam a, mihring thihna hial a thlen ta fo bawk a ni.

Mi tin hnam tin hian thingtlanga khaw­sak ai chuan khaw­pui an bawh deuh vek a, chutiang tho chuan Mizote pawh khawpuia chen tum kan tam em em a ni. Aizawlah hian mi tin deuhthaw-in awm kan duh a, kham bakbarek-ah te in kan sa a, a thlang lam a him nge him lo, a chhak lamah lei tawlh mai thei a awm nge awm lo kan ngaihtuah tawh ṭhin lo.

Heng avang hian chhiatna a tam phah em em a ni. Hmanni lawka Zobawk khuaa lei tawlhin in a hnawl ang chim phei kha chu a chhak lam aṭanga leimin vang a ni a, a chhaka leimin kha tawlh huk lo se chu kha in dinna kha a him viau pawh a ni thei. A chhakah in pahnih a awm a, an lei laih vung in chhekkhawm a tam bawk pawh a ni thei.

Tuidawn ṭha a awm si loh chuan kha lei in chhekkhawm khan leimin a siam lo thei lo a ni. Mi pali laiin nunna an chan phah a, a pawi hle.

Chutiang chuan Aizawl khawpui chhungah pawh hian ṭhenawmte fimkhur loh zar zo an awm fo. Mahni in chauh ngaih­tuaha in sa an awm nawk mai. Tuichhe paihna ṭha awm lo leh tui luankawr ṭha siam loa kawmthlang lama tuichhe paih leh tuihawk luantir an awm a, heng mite avang hian an ṭhenawmte leh an­mahni ngei pawhin an tuar thei tih hriat a ṭha. An ni aiin a thlang lama awmte'n an tuar leh zual thei.

Chuvangin, Mizo­ram khaw awmdan aṭang chuan furpui kan tawng chho mek a, ruahtui a tam dawn nge dawn lo hriat a ni lo a, fimkhur hi kan tih theih ṭha ber a ni. Ruahtui kan lo dawnsawn dan te, kan mamawh loh khawl loa kan paihna lam te hi fimkhur a va ngai tak em.

Kan in sakah hian mahni chauh in ngaihtuah chi a ni lo, khawpui kan bit tawh ropui si a, kan ṭhenawmte tan a him em tih thlenga ngaihtuah chunga kan in leh lo kan enkawl a ngai. Chuti lo chuan kan fimkhur loh zar ṭhenawm khawveng ten an tuar zel ang a, mahni pawhin nasa takin kan tuar thei. Mitin i fimkhur ang u.

- Lal Rinmawia