Kawng kam hotel hi tih changkan a va ṭul em
Kawngkam Hotel chungchang hi, social media-ah tawi tein ka post a, rin aiin kan lo ngaimawh tlang hle tih a lang. "Kei chuan ka ei tawh dawn lo", tih comment a tam hle a, tawn hriat tam tak zingah, hnam dangin kan Hotel-a chaw ei hi an chak lo hle tih te, pakhat chuan bowl hran a dil a, an pe duh lo a, a chhuak daih, tihte a ni nawk mai.
Hmanah khan khualzin Hotel-ah hian, mahni ei tawk te tein, bowl hmang khan chawhmeh min chhawpsak ṭhin a, ei man an tih sân hnu hian, belthleng lian hmang hian min chhawpsak thur ta mai a, a man kan san a, duhtawkin ei rawh u, an tihna a ni awm e.
Kan thil chin thar hi, a ṭawp in ti ve lo maw? Kan chawhmeh an rawn chhawp kha, kan insuah pawlh nawk nawk mai a, an rawn chhawp kha kan ei bang ngei a, kan ei bang kha a belah an leih lut leh tawp a, an chawk rawk rawk a, kan hnunga mite an chhawp leh mai tih ka va hmu a.
Chuti a nih chuan, keini pawh kha, kan ei hmaa eite ei bang kha kan ei ve a lo ni a, kan ei hmaa eite kha, an chhangchhe angreng phian a, an che fai vakin ka ring lo, an ei bang ngei kha min chhawp kha a ni awm si a. Ka chil a rial thar leh vel a.
Hetia tih dan thar kan hmang ta rau rau a nih chuan, khuhhriang chhin neiin, alaiah chhawp ta se, bowl hmangin mahni ei tawk te tein la chhuak ṭhin ila, tho thlawk sup sup lakah pawh ngaih chu a ṭha deuh ang.
Sil tur erawh a tam deuh ang, mahse thianghlimna lamah kan intlansiak mek a, a awlsam ringawt hi um loh a ṭha hle mai.
Kan Hotel sawngbawl dan hi ṭha lo tiin, YMA lam pawhin ngenna lehkha an pe tawh, tih ka thu post comment-ah ka hmu bawk a, ram pum huap chu a ni lo a ni ang, nge an zawm duh chuang lo zawk? Tu control tur nge ni ang?
Hotel neitute pawh lo inenlet teh u, mi tam takin in Hotel-ah chaw ei an chak tawh lo, hnam dang pawhin ṭawp an ti a nih chuan, ka ram hmel lanna lian tak in ni tih inhre teh u.
Kan hotel sawngbawl dan ang hi, tu hnam mahin an kalpui ve lo. A thianghlim tawk lo hi a zahthlak a, kan hnam mualphona a thlen tih i hria ang u.
- Lalrinliana Colney