MAIMAWM RIL LEH KAN RAM RORELNA!!

Tunlai mai pawh a ni tawh lo, hun eng emaw aṭang tawh khan Kristian ram tia inchhal ve fo ṭhin he Zoramah hian rorelna inang lo, thlei bik ram neia rorelna langsar tak tak sawi tur leh hriat tur a awm chho ta nuk mai a, mi rethei leh dinhmun hniam zawkte tan phei chuan mahni dikna leh chanvo humhim tur pawhin a tih ngaihna a awm lo a chha a nih tak ber hi.

Milian, mi thil tithei leh mi hausate'n an duhthala nuam an chenna leh an vawk lal lenna ram, duhtawk leh chin lem nei lova Mizoram Budget an duhthala an eirukna ram, mi retheite'n kan chan ve tur tlem te, kan lu chunga vaivut tak ngial pawh it leh awt ngawih ngawihtute'n ro an relna ram, mi dik takte nekchepna leh rahbehna ram, aiawh lal hmaa ding, sawipuitu leh tihpuitu nei ve lote tan phei chuan lungngaia ṭahna a ni, aw Lalpa tih hla ang mai khan, kan hlimna leh lawmna ni ve tura kan ngaih, kan lo inhnem ve nate pawh beidawnna khua tiseitu mai an ni a; hla takah min kalsanin hnuchhawn ramah min hnutchhiah a, thlalera hnim ṭo ang maiin kan khawro ri re mai a nih hi maw.

Dan leh hrai lek kawh kawngah phei chuan thil ṭha chhuak tur leh thil dik lo titute hremna pekna kawngah beiseina thar a awm tawh chuang lem pawhin a lang lo ve. Ram hruaitu, MLA leh Minister te bakah Officer lian tak tak te, ram mipuiten eiru ngei nia kan hriatte pawh Dan chunga leng ang maiin zalen takin an la tualchai a, an inlulingin an chapo phian mai lehnghal a. Thil dik tak duhtuten Police ah F.I.R te thehlutin, Court thlengin thubuai siam ṭhin mah se la, dik lohna nei lovin thiam chantir an ni a, an sezawl chhuh leh mai ṭhin si a!

Chuta chhapah uangthuang takin an ṭawng chhuak a, zahnate chu khawi lam, an thlavang hauh zawnga thuchhuah siam tawk lah bo hek suh. Mipui lam chuan khami kha khengbet rawh u, kan tih rilruk ṭhuai ṭhuai tawh te pawh Juda mipuiten Pilata hnena Nazareth tlangval khengbet tura an nawr leh, a aiah misual tawng taw raw Baraba tan ina tang lai chhuah zalen tura an au rual ang mai khan, kan ram Budget, mipui sum tam tak chheprelh ngei nia kan hriatte chu Court rorelnaah erawh mifel famkima puan an ni leh tlat si ṭhin hi, a mak nge a mak lo pawh a hriat tawh loh ve! Sawi ngaihna pawh a awm lo.

Thil sual titute hremna pe tur leh dik taka rorelna kalpui tura kan ngaih ber Court rorelna lah chu MAIMAWM RIL ang lek ni berin a lang. Maimawm rilah hian rannung chi hrang hrang an tang ve ṭhin a, chutianga maimawm rila tangte chu rannung te tak tê tê an nih laiin, rannung lian deuhte erawh chuan an su tlang a, engah teh vak an ngai lo, an tan harsatna leh buaina lian tham siamsak theitu a ni ve tlat lo. Chutiang chu tun dinhmuna kan ram rorelna kalphung chu ni berin a lang.

Kan ram Court lian tak takah hian MLA leh Minister te, Officer lian tak takte thubuai siamsak an lo ni fo tawh a, mahse tun thlengin thiam loh chantir emaw, hremna pek emaw, lung in tantir leh an hna aṭanga bang ta emaw hriat tur an la awm lo niin a lang.

Chutih lain mi rethei dinhmun tleu lak lawh, mahni remhriatna leh theihna zawna lei rem rah tuma eng eng emaw ni tite erawh chu he MAIMAWM COURT - ah hian an in ham buai a, thiam loh chantir an ni a, an tang a, a na thei ang bera hremna pek an ni leh si ṭhin. Mi retheiten kan chanvo dik tak kan chan theih nan leh kan dikna leh zahawmna kan humhim vena awm chhun chu rahbehsakin kan awm mek a nih tak ber hi.

- ZR Lalthlanmawia