Zan Curfew ka hrethiam ve tawh lo
Hman deuvah khan, "Lockdown leh curfew damdawi min chawh hi kan dampui loa kan zual zel a ni," tih kha ka ziak tawh a, chutah chuan, 'Covid 19 avanga Lockdown nei rei ber kan ni a, Lockdown hi damna tur chu ni se kan dam tawh anga, Zan Curfew te hi hri tlemna tur chu ni se kan hri vei hi an pung lo vang, chuvangin a hmasaa ka sawi duh chu Lockdown (Partial Lockdown pawh) hi a zavaia tihtawp tawh ni se, hei bakah hian zan curfew pawh hi thil sawt lo a nih vangin tihtawp ni tawh rawh se,' ka lo ti tawh a ni.
Keia ziah vang ni miah lovin Lockdown chu kan han titawp ta a, kan chhiatpui hauh lo va, Lockdown kan ṭhatpui loh dan aṭanga teh dawn phei chuan hlep hlangin tunah hian kan awm mek a tih theih a ni. Hetihlai hian zan lama eizawngte hrekin an la awm chhunzawm zel a, ka lo ziah tawh angin zan lama ei zawng hi an tam hauh lo vang tih chiang tho mah se, zan lama eizawngtute hi tunah hian kan sorkar chak tak hian kum hnih dawn an eizawnna a hrêk tawh a ni. Zan Curfew hi curfew bawhchhia mipui (2023 ah voter an la ni dawn) pawisa an it ta emaw tih tur a ni a, chhunah inkhuahkhirhna pakhat mah a awm tawh loh chuan zan hi hri danna chu a ni tawh lo va, sum tuakna a ni tawh zawk lo maw?
September ah khan ka thu ziakah khan, "April 19 aṭanga he thu ka ziah thleng (September 6, 2021) hian Lockdown leh Partial Lockdown hmangin Aizawl chu min la khuahkhirh char char a, Lockdown laia a mar pata hri vei an pung ang thovin Partial Lockdown ah pawh a pung a, Zan Curfew chu hri dona atan a sawt leh sawt loh pawh zirchianna awm chuang lovin kan la kalpui zel a ni," tiin ka lo au ka lo au tawh a, keini âk zât hnih hnuai lamte au au chuan awmzia a neih lohzia chu November thla chawhnu lamah pawh kan sorkar chak tak chuan Zan Curfew a puang zel a, a chhan sawi tur a awm lo va, crime rate tlahniam, accident hniam tih mai mai hmang hian mipui zalenna hi rap bet tawh lo se, Zan Curfew hi hlip tawh se, India ram hmun danga Zan Curfew kalpui pawh kei hriatna nei zau lo hi chuan ka hre tawh lo a ni.
- Lalremruata