IAS-a Civil Service mi ni lo hlankai hi

Mizoram Civil Service ni lo zawng, Department 30 vel aṭanga Officer intêl khâwm, Mizoram Departmental Officers' Association (MDOA) hovin, President ka nih lai (2012-13) khan Non-CS promotion to IAS quota pakhat ni reng mai hi kan enghelh em em ṭhin a, tichuan pakhat kan dil belh ta a ni.

Dàn leh hrai ràwn àwm chin chi hrang hrang - ram danpui leh sorkar inrel­bawlna dan bik (public administration) te kan bih nasa a, kan bei nasa; Sorkar hotu lian, CM thlengin, kan hmu kim thawthâng ang. Kei pawh Delhi thleng thlengin ka kal a, a tawpah Mizoram Sorkar leh Sorkar laipuiin min tihhlawhtlinsak ta hi kan lawm hle. Heti hi chuan, tlêm tal chuan dan mit aṭanga han bihin Administrative checks, balances and equality a awm phah deuh pawhin kan ring.

A mi mala han sawi takah chuan, ṭawng mawi lo ni lo sela, MDOA President ka nih laia kan hmalaknaah chuan ka thluak ka hman nasatna ber, ka dam chhunga kan hnam tána ka thil sawi tawh, Pawla kan hotute leh thawhpuite ṭawiawmna avang ṭha leh tui nena nasa taka kan beih Sorkarin min tihhlawhtlinsak ropui ber zinga mi ni-ah ka chhál ve a; a àwm lo lem lo vang chu. A chhan chu, a hunlai vel khan kei aia Officer lian leh fit-ho, eg Pu Lalthangliana Varte, Pu Ngurbiaka, Pu Jimmy, ldt)-ten mahni inphata MDOA President atana a mi tling lo ber min dah kha Pathianin mal a sawm a lo ni ka ti.

Ka speech neih hmasak bera he thil hi hlen tura ka intiam/ insawi bat chu Pathianin mal a sawm a, rin aiin kan Sorkar hotute an lo inhawng a, Association mem­ber, kei aia thil hre zawk, kan hotute leh ka thawhpuiten min thlawp ṭha bawk a.

Tichuan, a tawi zawngin sawi ta ila. Non CS-in post pahnih kan lo nei ve ta a ni. Deptt of Personnel & Training, GOI-in IAS post CS mi ni lo luah atana a han puan ruah '(declared vacant) hmasak ber han hriat phei chuan beng thleng thlengin bawp kan khai mai alawm.

A nihna takah chuan 1980 chho vel aṭang khan post hi 2 awm zel tawh tur ni àwm tak kha a ni a. Chutiang chu ni lovin pakhat ngar ngar a awm a, chu Post pakhat chauh chu Pu Denghnuna khan a luah ngar ngar a, a pension hnuah Pu K Lalnghinglova’n a luah leh a. Pu K Lalnghinglova pension hun nghah leh ngar ngar mai ai chuan Sorkar kan dil belh a, tichuan a retire hma deuhvin sorkharin post pakhat chu min han pek belh leh ta hlauhva, pahnih kan lo nei ta a ni. Sorkar, a bikin kan Ministry kal lai chungah MDOA kan lawm hle.

A hmain Service pakhatin an luah ngar ngar nia lang, hetia Non Civil Service tana tih a lo nih tak avàng hian a chang chuan MDOA member-te hi he post lo luah ṭhin service-te hian min dem mai palh ang tihna rilrute pawh kan pu ve lek lek ṭhin; amaherawhchu chutiang chu ni êm lovin ram leh hnam tan a ni tih hriain min hre thiam hi kan lawm hle.

Sawi tawh angina a hmaa luahtu, Pu Denghnuna leh K Lalnghinglova te kha I & PR Deptt Officer-te an ni a, an hnua heng hmun hnih rawn luahtute erawh hi chu Mizoram Health Service (MHS) aṭangin an ni daih thung. Kan hriat angin he post ruak hnuhnung ber, 2017-a mi chu Dr Lalhriatzuali, MBBS chuan a takin kumin 2018-ah a rawn luah dawn a, seniority hi eng kum nge an pek ang tih lo inrinsiak chhin ila. Entir nan, 2013/14-a IAS inziak tlingte seniority ang kha an pe maithei a ni.

Engti kawng mahin a seniority chu nikum emaw kumin emaw hi chu a ni dawn lo hrim hrim a, he lam hi chu thu neitute kutah i dah phawt mai teh ang.

Non-CS post pakhat zawk luah mektu Dr Lalrozama (Mapuia), MBBS, MD hi 2028-ah pension tur angin chhût chhin ta ila. Chu hmun ruakah chuan eng Deptt Officer nge lut leh leh ang, Soil leh Fisheries lam aṭangin nge, Engeneer-te awmna PWD/ PHE/ Power Deptt. aṭangin nge, Social Welfare, Art & Culture, Geology & Mineral Resources, Tou­rism, SCERT, LESDE, etc aṭanga officer-te aṭangin tih inrinsiak ai chuan, he administrative structural change/ adjustment hi admi­nistrative development chi khat a nih avangin, ram hruaituten mipuia hma­sawnna (development) an thlentirna kawngah hma­sawnna eng emaw tak chu a thlen phah ngei turah beisei zawk ila a fuh ang.

A thlan chhuah dan procedure lamah duhthusam lo laite chu a awm mai thei e; mahse chulam chu rilruah a awm rih lova; kan lawm em a, sawi zel tur awm nual mah se, i duhtâwk rih phawt mai teh ang.

- Dr J.T.Vanlalngheta, LLB, PhD, DLitt, Life Member, Indian Institute of Public Administration, New Delhi