HMEICHHIATE

Kan pi pute hunah kha chuan, hmeichhhe finin tuikhur ral a kai lo, hmeichhia leh pal chhia chu thlak theih, tih te a ni. Hmei­chhiate khan hna an thawk nasa a, zingah an thova, tui an chawi a, buh an deng a, eirawng an bawl a. Nulate pawn tlangvalte tihlung nih loh hlau reng rengin hun an hmang.

Hetiang hi ni­mahse, khawtlang, inchhungkhurah te an chan a ṭha chuang lo a, mo ngat phei chu an dinhmun a ṭha lo hle. Hun a kal zel a, dan eng eng emaw a awm thar a, mah se, vawiin thleng hian chanchin duhawm lo tak tak kan la hre fo a nih hi.

Tunah chuan hmei­chhe engineer, doctor, professor, kan kat ta nuk mai. Office lamah leh sumdawnna lamah pawh hmeichhia an tam ta hle. Chhungkaw enkawltu fel tak tak an tam ta hle.

Hetiang a ni chung hian khawtlang, kohhran leh ram rorelnaahte an hmel hmuh tur a la awm lo hle. Quota-in local council/ V.C., etc ah te kan hmu ve ta zauh zauh. Kohhran lamah pawh Kohhran tenau deuhah tih loh Kohhran lianho ah chuan a khaipa an la ni thei meuh lo. Hetihlai hian sawrkarin, Mizo Customery Law, a siam tharah chuan hmeichhiate chan a ṭha sawt hle. Hei hi a kengkawhtute leh a hmangtu tur te hian kan ṭangkai pui thei tak tak ang em?

Hmeichhia te hi chak lo zawk an nih vangin kan duh duhin kan tur a ni lo, in chhung khur leh khawtlangah te hian han awm ta lo ngat se chuan a khawharthlak turzia chu!

Ram changkang zawk te kan han thlir a, an hmeichhiate dinhmun a ṭha thaw­khat hle. Hmeichhiate awp behna, nekchepna ram, e.g. Arab ram ang te han thlir ila, hausa hle mah se keini takngial pawhin chen nan emaw kan la awt chhin ngai lo chu a nih hi.

Ram changkang leh changkang lo tehnaah pawh, hmeichhiate dinhmun ṭhat leh ṭhat loh hi tehfung pawi­mawh tak pakhat a ni reng a ni. Salva­tion Army phei chuan hmeichhiate pawi­mawhzia hriain kum tinin May chawlhni hmasa ber hi nute ni (Mother’s Day) atan an hmang a ni.

Thuthlunghlui hunah pawh khan Israel faten an hmel­mate an beihna kawngah khan hmei­chhiaten hmun pawi­mawh tak tak an chang ve fo a ni. Mi hlawhtling tak tak kan en chuan an phenah an nupuite emaw anmahni lo ṭanpui hmeichhia an awm ṭhin. Mizoram sawrkar pawhin 6 July MHIP day hi holiday atan a puang ve bawk a ni.

Hetiang hi ni­mahse, tam tak chuan awp beh, nek chep etc an la hlawh reng thova. A chhan chu kan dante kengkawh thei tur leh an thate tichak turin nang leh kei hi mawhphurtu chu kan lo ni.

Sawrkarin hma nasa taka a la chung hian chanchin ngaih­nawm lo hmuh/ hriat tur a la awm fo mai. Hmeichhiate pawn theihna leh chanvo ka nei tih in hriain, lo in sang phek ve ṭhin ang u.

- Lalchhandama Colney