Zoram Politics-ah 'change' a awm ang em?

November thla tawpah emaw, December thla tawp­ah emaw kan inthlan leh dawn a, inthlan a hnai ta hle.

Sawrkar lai Congress Party-in hmasawnna ruhrel lian tham an din sawi tur a tam lo. Infiamna hmun buatsaihah erawh chuan MNF sawrkar kha chu khum nasa tak an ni. NLUP-ah sum an sem nasa a, tunah NEDP ti lehin, sum tam tak an seng ral leh mek bawk.

Kum 10 dawn an sawrkar takah chuan Congress Party laka phun neuh neuhna a tam ve ta. District pek tiam pek leh si loh nia sawi te, Minister hawihhawm tak enkawl Depart­ment hnuaia kawng ṭha hleithei lo leh lei dawh fuh hleithei ṭhin lo te, Sports lama hming ṭha an Minister chhuanvawr ber hnuaia mi, SIPMIU hmalaknaa sawrkar sum ren baksak lo taka hman ni-a sawi, Dihmunzawl-a cheng nuai 63 teh meuh maia In ṭhiah thu te, SIPMIU

aṭang veka motor leina leh toilet siamna manto lutuk ni-a sawi mek te, inthlan dawn hnaiha NLUP leh NEDP hman nghek mai tum te, NLUP thlangtu atana Congress Party candidate tling lote hman tlat mai te, zu avanga thi an tam ta lutukte hian mipui titi chu a titam ve ta hle a ni.

Opposition party lian ber MNF mi leh sa tam takte chuan Congress Party hi term hnihna a nih avangin a tlak tawh an beisei a. Mipuiin MNF hmanga an thlak an beisei bawk. Party chhungah a 'senior' ten candidate an chuh na hle nia sawi a ni.

A lan danah chuan, bial tam takah kum 2008 leh 2013 inthlana mipuiin an hnawl tawh MNF hruaitu ngaite tho khan an hneh loh ngaite bawk khin leh an tum niin a lang. Hetih lai hian Congress Party mi leh sa ṭhenkhat chuan MNF-ah hian an hruaitu ngai leh mi hluite hi ding leh sup sup se, hneh leh phuk phuk ila tiin an lo chang ve khiau a. Bial ṭhenkhatah phei chuan MNF party-in hneh awlsam deuh tur mi senior, mipui ngaihzawn lem loh lo thehchhuak se tih vanga lo sawimawi puinate pawh a thleng mek nia sawi a ni.

Congress leh MNF tih loha opposition lian ber tura ngaih, Zoram People's Movement pawhin tun ṭum chu 'change' siam tumin hma an la nasa hle mai. Mipui rilru pawh an tithar nasa hle niin a lang a. Hetianga politics tihdanglam tumna boruak a len hian mipui rilruah sawrkar lai duh khawp lohna a piang nasa duh hle.

Kum 1998 hnu lamah MNF-in term hnih a chelh hnu, Congress Party-in term hnih a chelh leh hnu hian Minister leh MLA-te in tha pui pui neih thu te, an hausak tak thur thurna lam thu te, party hruaituten contract an thawh thute hi kan hre chamchi a. Ram tana an inpekna lam hriat tur tlem si hi mipui tan a hneawm. Ram ti ropui si loin anmahni an ropui ringawt zel mai hi chu mipui tan a na vawng vawng a ni. Hei vang hian ZPM te hian candidate an neih ṭhat chuan mipui hian an bawh huk lo ang tih a sawi theih ta lo a ni.

Hetih lai hian opposition party hruaitu hluiten candidate an inchuh vel mai mai chuan Congress Party pawh hi an la sawrkar leh thei khawp ang. MLA 35 aṭang hian an khin tur a zirin la tling leh thei tur hi an nei nual niin a lang tlat.

India ram state dangte thlir pawhin term thum hi a sawrkar theih khawp ang. MNF kha term hnihnaah an tlak avang ngawta Congress hi term hnihnaa tla tura rin ve ringawt hi chu beiseina leh rin thu mawlmang tak a ni. Zoram mipuiin MNF an duh lehna turin hruaitu thar, kalphung thara Zoram min hruai theitu tur an awm em? MLA candidate-ah ṭhangthar viak ṭha leh mi thiam, ram hmangaih tak tak turte an awm em?

ZPM pawh chuti tho. ZNP leh MPC-a lo awm tawh sate thoin candidate an inchuh leh sup sup chuan ZNP leh MPC tanrualna bak engnge a nih leh chuang ang?

Engpawhnise, sawrkar a ṭhat a, mipui an lawm phawt chuan term thum aia rei pawh sawrkar theih a ni. India ram Chief Minister ṭhenkhat, Jyoti Basu te, Narendra Modi te, Chandrababu Naidu te, Gegong Apang te chanchin hi lo zirchiang ila a ṭha ang e. Pu Zoramthanga pawh term hnih a CM thei a, Pu Hawla pawh a aia rei a CM thei.

Hun rei a ni ta lo. Zoram poli­tics-ah change a awm ang em?

- C. Lalnghinglova