NLUP BAWK LE!

Tunlai chu chan­chinbu han thlir ila, phek hma lamah ‘NLUP sem’ tih te, ‘NLUP Thlang tur ruat’ tih te, “Ruling MLA bakah NLUP thlang tur ruat’ tih te kan hmu ṭhin a, heng han hmuh hi chuan kan sorkar pawh hian NLUP hi ‘a tlai lam umpawng par’ pui a ni awm mang e te pawh a tih theih!

Nikum khan kan CM khan ‘NLUP hi kan zo tawh a, kan chhunzawm tawh lovang,’ kha a ti a. Mahse a hnu leh lawkah chuan NLUP hi an la chhunzawm zel tur a sawi leh a. A chang leh NLUP hi a thlaktu tur NEDP kan kalpui tawh a, kan chhunzawm lovang ti ang zawngin a sawi bawk a. Kei ni thingtlang sipai bang chu kan bo map mai a!

Hetiang teh nuaih a nih karah tunah chuan ualau takin a dawng tur thlangtu tur, ruling MLA bakah MLA bial ṭhenkhat, opposition MLA naah mi dang ruat a nei leh ta a, heng tuna a thlang tur ruat chhuahte hi chuan han thlang sa teh mah se tun term chhung hi chuan an dawng a nih pawhin First Instalment bak an dawn hman hmel lohva, an hma lak hun hi a tlai deuh awm mang e. Hlawhtlinna tak tak lam chu an tum ber ni lovin, lamṭang siamna, hnang vara inhlinna lam a kawk zawmah awm asin le.

Heng ang thilte ngun taka han thlir chian hi chuan kei ni thingtlang mite hi min hmusitin ball mumah min hmang kual vel mai mai a ni tih hriat a ṭha hle mai.

Kan kuthnathawh hlawhtlinna tak tak lam hi min ngaihtuah pui lova, an lama kan ṭan a, kan vote kan pek theih nan tiin, pawisa tlem azawng ti hian min han tawkdarh sak a, kan hlawhtlinna tur tak tak leh kan dinchhuahna lam tur chu min ngaih­tuah sak hauh lo tih a chiang hle awm e.

Thingtlanga NLUP dawng full tawh chhungkaw heti zozai aṭang hian han thlir ila, khaw khatah hlawhtlinpui hi engzat tak awm ang maw! Khaw tin aṭang hian kutzungṭang hi kan chhiar kim thei meuh ang emaw chu le!

NLUP hi kalpui tirh a nih lai ngat phei kha chuan thingtlang khaw tam berah hi chuan a dawngtute khan a ruk aralin an dawng a, an inthup tlat zel a nih kha! Eng ber nge maw an hlauh ni! Khatiang pawisa tam tham a thlawna dawnte chu phur pui a, a petu Congress fak nana hman tak aruangin a ruk thei ang berin an dawng ṭhin nia! Khang aṭang reng khan thil thianghlim leh felfai chu a ni vak lo tih a hriat theih mai awm e.

NLUP hian kawng eng engah emaw chuan mi a siam changkang ti ten an sawi ṭhin. An trade thlan lamah hmang lo mahse in chhung bungrua eng eng emaw lei nan, an neih phak loh neih phah nan an hmang a, a la tha tho ti ten an sawi ṭhin. Mahse pawisa thianghlim lo leh kut tling lova hmuh chu that ziktluak phah nan kan hmang ngai lo an lo tih hi a dik fut awm e.

Hetia thawk lova sum dawn kan chin a, NLUP hmanga kan dawn tak chinah hian thingtlang mipui tam ber hi chuan thawk lova dawn hi kan tum ta lutuk a tih theih awm e. Huan pawh siam se Horticulture lam emaw Agriculture lam aṭang emaw a pawisa dawn tumin an bei ṭang ṭang duh ta zel zawng a nih hi! Kan rilru leh sukthlek (mindset) min tichhia a, min hruai khawlotu ber hi chu he NLUP, a thlawna pawisa kan dawng hi a bul berah chuan a ni kan ti thei ang.

NLUP hi kan la sem zel dawn a nih pawhin a sem dan tihdanglam tawh ni se, a thawk ngeite chauh sem ni se, tin, a thlangtu pawh hian a phu ngei chauh thlang tawh sela. Congress member a inziaklut duh te chauh thlan ang em em kha chuan kal tawh lo se a ṭha hle ang.

Pathian hre hauh lova NLUP kan kalpui a, a dawng turah pawh khawngaihna tel hauh lova kan kal fawr lutuk ang kha zawng malsawmna pawhin a ṭin san ang tih a hlauhawm em mai a!

- Patrick Z, Chingchhip