Tampui mitthi kan hmaah

Khawvelah hian hripui rapthlak tak tak vawi tam tak a lo leng  tawh a. Chung zinga ṭhenkhat chu han sawi lang ila.

1)Black Death (1331-1353): Khaw­vela hripui leng  tawh zinga mihring suat  tam bera ngaih a ni. Mihring maktaduai 75-200 thia ngaih a ni.

2) Plague in Roman Empire.0075-0200: Mihring maktaduai 5-10 an thi. Thi zingah hian an Emperor pawh a tel. 

3) Spanish Flu, (1918-1919): Mihring maktaduai 50-100 an thi. 

4) European Plague (1361-1480): Mihring maktaduai tam tak an thi a, England-ah mihring 50% an thi. 

5) Plague Pande­mic 1855: China rama intanin mihring makta­duai 10 an thi. 

6) Asian Flu: (1957-1958): China-ah  identify hmasa ber a ni a, mihring maktaduai 2 an thi. Heng hripui lengte hian thihna rapthlak pui pui a thlen bakah ṭampui mitthiin a zui deuh vek a ni. 

Covid-19 hripui pawh hian mihring engzat nge a tih hlum ang a, eng chen nge a len ang tih hre rih lo mah ila, he hripui len lai leh a reh huna kan economic dinhmun a nghawng chhiat nasat turzia leh ei leh bara kan harsat phah nasat dan tur ngaihtuah hian, khawvel ram hrang hrang hruaitute lu a tihai tak zet a ni. 

Ram tàm takah chuan Expert Commi­tee te dinin economic leh ei leh bar lama kan dinhmun tur thlirin an buai hle tawh a. India ramah pawh state tam tak chu hripui leh lockdown avanga ṭampui an tuar lohna tur ngaihtuahin Committee te an din a. An hlawhfa chhawrte an kal bo avàngin buh aia tui ngai tlem la (cotton) chin tam tum loneitute an awm nawk mai. 

Punjab state chuan Planning Commission Vice Chairman hlui Montek Singh Alhlu­walia chairman-na hnuaiah Expert Commitee dinin Prime Minister hlui, Manmohan Singh chu Over all Supervision ti turin an ruat a ni. 

India  ramah hian  kan buh leh bal thar chhuaktu ber Punjab, Haryana leh Madya Pradesh te chu Bihar leh Jarkhan Labour a innghat an ni. Bihar ringawt hian state danga inhlawhfa, an state mi tuna an phurh hawn nghal tur hi màktaduai 2.5 an ni a, social distancing an kalpui chuan bus an mamawh zat chu 1,70,000 zet a tling dawn a ni. An sorkar luhai chu thudang, Punjab leh Haryana loneitute chuan hlawhfa an duh zat an neih dawn loh avangin an lungngai hle. 

Punjab leh Haryana berin buh an thar tlem chuan anmahni thar chhuaha innghat state dang tam ber chu kan ṭam dawn. Mizoram hian buh leh thlai chin uar sawi sawi mah ila kuminah kan lo pawm a zim a, chul rit pawh ni ila thingtlang tan thlai leh buh chin hun chu April-May  a ni. 

Buh thar rang phei chu ruahthimpui khalha chin a ṭha ber. Tunah ruah­thimpui a thleng mek. Hun kan nei tlem ta hle. 

Politic ngaihtuah tel miah loin, kan ei leh bar ngaihtuahtu tur Chief Secretary (rtd) emaw mitiam dang chairman-na hnuaiah Agriculture, Horticulture lam leh mithiam tlem telna Expert Commitee dinin kan ei leh bar thar­chhuah tam dan tur chawl loa ṭhutkhawm a, zir a, ngaihtuah a, Covid-19 avanga buai em em kan sorkar hi thurawn (advice) ṭha pe reng tur din vat  a ngai. 

A hmanhmawh thlak tak zet. Ṭampui mitthi-in min hmuak. In dem hman a ni lo a, Politics a lak chi a ni hek lo. Mizoram mi­puite i ṭangrual ang u.