Thla 20 chhung zan curfew a ni ta
Nikum March 23 aṭanga Mizoram pum (India ram pum) total lockdown a nih hnuah Mizoramah chuan zan lamah curfew a la ni ta char char a, zan curfew hun chhung hi kum khat leh thla riat (thla 20) chhung a ni ta.
Tun dinhmuna Covid-19 vanga Mizorama kan nunphung a la pangngai lohna langsar zualte chu –zan lama khawpuia curfew, inkhawma zai chungchang, zirna in hawn dan leh mipui punkhawm theihna huaihawt dante a ni deuh berin a lang tawh a; thil dangah chuan nunphung a pangngai ang a ni ber tawh.
Kan nunphung a la pangngai lohna zingah hian mipui punkhawmna huaihawt hian zawm a hlawh lo ber. Thupek bawhchhia, a bikin sawrkar hotute telnaah phei chuan zawm a hlawh lo lehzual a; a hrem theitute pawhin hrem an tum hek lo a, an hrem ngam lo.
Biak inah inkhawm phal ni tawh mah se, sawrkarin a la khuahkhirh hle a, hmun tam takah chuan zai phal a la ni lo. Kohhrante pawh a fimkhur thei ang berin an kal tih a hriat. Mizorama Covid-19 dinhmun hi a la ṭha lua lo a, nikum December thla leh kumin January–April thla laihâwla hripui dinhmun ai khan tuna kan dinhmun hi a la ṭha lo zawk hle a; chuti chung chuan tunah hian nasa takin kan inthlahdul tawh zawk.
March 23, 2020 aṭanga kum khat leh thla riat chhung zan lamah curfew a la ni ta char char a; inkhuahkhirh nasat a ṭul zual lai kha chuan a ṭul pawh a ni ang. Tunah erawh chuan kan inthlahdul tawh em em a, chhun lamah khawlaiah mipui kan inpáng-aw-inzial tup tup tawh a, chutih laia zan lama curfew tih reng hi eng nge maw a ṭulna ni rêng le? Chhunah hripui a kài theih loh a, zanah kài a awl bik em ni zawk?
Tunah hian eng nge kan hlauh? Kan hlauh laka invênna atana hmalaknate leh inkhuahkhirhnate hian hripui lakah min veng rêng em, tihte hi ngaihtuah a ngai khawp mai. Tunah hian zan curfew hi Covid-19 laka invênna atana tih a ni reng em? Ni se, mipui chhuah tam zawk hun lai chhun lamah eng ngati nge kan inkhuahkhirh tawh si loh? Zanah rau rau pawh mi nawlpui men lai leh chhuahvah hun zan tir lam a zalen a, in lama mi awm tam tawh hnu, zan dar 9 hnu lamah curfew a ni zawk tlat bawk a!
Heng zawng zawng ngaihtuah hian, sawrkarin zan curfew a la rih reng chhan hi hripui laka invenna chu a ni tawh lo chuan a lang. Sawrkar ngei pawhin hripui veite sûlhnu chhui (contact tracing) a tih ṭhat duh tawh loh laia zan curfew la tih reng hi mipui zalenna rahbehna chi khat a ni tawh zawk. Chuvangin, zan curfew hi hlih a hun tawh a ni lo'm mi?
- Zoramchhana