COVID VIRUS LEH TV HOME CRUSADE

Tunlai khawvel pumpuia hri leng hlauhawm tak Covid virus hi Pathianin keini Mizo Kristiante tana simna thu puan chhuahna hmanrua atana a rawn hmang hlauh mai hi a va makin a va lawmawm tehlul em! A hria apiangte chu tumah lawm lo kan awmin ka ring lo. 

Home crusade kal tlanga he simna thuchah kan ngaihthlakte hi tute mai pawh hian sim tur nei kan ni tih inhriat nan te, kan sualte sima Pathian hnen pan nan leh thlarau lam nun piantharna atante hmang ṭheuh thei ila a va lawmawm lehzual dawn em! Chutianga hmang theite tan chuan he thihna hripui leng mek hi nunna hripui leng mek anga sawi theih a ni dawn a ni.

He hri leng avanga TV Home crusade kan neih hian kan pianthar dan hi 'simna tel lo piantharna' mai a nih leh nih loh pawh min ngaihtuahtir rawh se. 

Tunlaia kan ram Kristiante nun dan tlangpui nia lang chu mi tin deuh thaw mai hian ṭha leh dik kan inti em em ṭheuh mai a. Chutih rual chuan mi dangte chu dik lo leh fel lo zawkah kan dah vek thung a. Tin, kohhran mi kan nih angin kan tih tur leh mawhphurhna chi hrang hrangte chu hneh tak leh tling takin kan ti thei zel a. Mahse hetih rual hian kan in vei tawn ṭheuh a, tunge dika tunge dik lo tih pawh hriat hleih theih loh khawpin kan insawi a. Kan in vei tawn em emna pakhat chu sual simna tak tak kan nei lo hi a ni. Thuk deuh zawkah keimahni ṭheuh kan inbihchian a ṭul hle. 

Home crusade kal tlanga simna thu kan ngaihthlak mek lai hian mi ṭhenkhat chu an hmel leh an ṭawngkamah sim tum hmel puin an lang lem lo a, he programme pawh hi an ngaisang tehchiamin a lang lo. Mi zawng zawngin sim tur kan neihte a inang vek lem lo a, sim tur lian deuh leh tê deuh pawh a awm thei ang. Sim tur kan neiha zirin sim hi kan châk lo hle thei a, sim phal loh thil tam tak a awm thei bawk. Sual sim hian chânna (hlohna) nasa tak a ken tel avangin kan sim phal tak tak lo ṭhin a ni. 

Kum 1980 chho vela corruption do beihpui neih a nih lai khan mi ṭhenkhat chuan mahni insawimawi nan leh fihlim nan 'corruption' tih 

ṭawngkam hi an sawi zau thiam hle a. Anmahni chauh ni lova mi dangte pawh corrupt vek, kan corrupt dan erawh chu inang lo mai chauh anga sawi an tum a ni. Anmahni kha in en sela, mi corrupt tak a nih chuan insiamṭhat tum sela a ṭha hle zawk tur a ni a, mahse chutiang chuan an ti lo, a pawi hle a ni. 

Simna chungchangah pawh hian mi dangte sim leh sim loh lam aiin mahni in en ila, sim tur kan neih chuan i sim mai ang u. 

Zawlnei Samuela'n Saula hnenah, "Ding rih lawk la, Pathian thu ka han hrilh rih teh ang che" a tih ang khan tun hri leng hnuaiah pawh hian Pathianin, "In ni tin hnathawhte chawlhsanin han hahchawl (ding) rih ula, Pathian thu ka han hrilh rih ang che u" min ti a nih ber hi. Chuta Pathianin thu min hrilh tâk ber chu 'sim rawh u' tih hi a ni. 

TV Home crusade-a kan speaker te thusawi hi a thlawnin i luan raltir phal hauh suh ang u. Pathianin thil ṭha lo pawh thil ṭhaah a chantir a nih hi (Gen. 50:20).