Covid-19 leh Lockdown - Thil ṭhenkhat kan zir chhuah tur te: A eng lam zawnga thlirna

Hripui leng mek Covid 19 hian thihna leh tuarna a thlen nasatzia kan hmu chho mek a. Khawvel pumpui hi lungngaiin a rum mek a ni. Chu chauh ni lovin Khawvel pumpui Global economy te, kan ram economy-in a tuar dan tur te, banking sector hrang hrangin a tuar nasat dan tur te, hripui len hma hna nei mi tam tak hna nei lovin a siam dawn tih chu thil chiang tak a ni.

Chutih mek lai chuan he hripui leng hian kan khawvel huap leh Mizoram bil tan pawh hian thil tha tam tak a rawn thlen ve tho mai. Hetiang zawng hian in thlir/ ngaihtuah tlang teh ang u!

1. Boruak chhia nasa tak pe chhuak thin thil siamna hmunpuite khar thuap a nih tak avang te, zin vei vahna lam chi reng reng- Thlawhtheihna te, rel te, lawng te leh motor te-a zin chu khapin an chawlh tak thup avang te hian khawvel boruak bawlhhlawh lutuk tawh hi zawi zawiin a lo thianghlim leh tan ta a ni. Mi thil chhut mite chuan tun thla hnih khat chhung mai pawh hian khawvel hi a inthlak danglamin, hmel thar a pu a ni, an ti hial a. Khawvel hmar tawp Artic circle chung zawna khawvel boruak vawngtu Ozone layer pawp thlengin a phui chho leh tan ta niin an sawi. Khawvela khawpui lian tak tak Newyork, London, Delhi, Mumbai leh Madrid te pawh boruak a thianghlim sawt hle a ni. Khawvel huap hriselna kawnga vilvantu pawl lian ber WHO chuan kumtin mi maktaduai 3-7 zet chu kan boruak hip a bawlhhlawh avanga thi an awm thu an sawi a, kumin chhung hi chuan boruak bawlhhlawh kaihhnawih avang thi pawh an tlem sawt ngei ang. A rei emaw, rei lo emaw eng emaw ti chhung chu kan chenna boruak hi a thianghlim phah hle dawn a ni.

2. Mihringte hian Pathian thil siam dang heng ram ngaw te, a chhunga cheng ramsa leh nungcha te dimdawina tel hauh lovin kan tichereuin kan suasam nasa hle a, sumdawnna atan kan hmang zui a. Tun lai khawvel hian sum hi a pathiana, engkim mai hi sumin kan teh a ni hrim mai. Ram ngaw tichereu a, a chhunga awm ramsa leh nungcha te nun ticheptu ber mihring te kan inkharkhip miau avangin Pathian thil siam dangte tan erawh zalenna dar a ri ve thung a. India ram leh Mizoramah hmun hrang hrangah pawh chu mi dikna chu kan hmu mek a ni. Khawvelah hian mihringte chauh kan cheng lo va, khawvel hi mihringte ta bik a ni lo tih Covid-19 hian min hriattir mek a ni. He hun atang hian Pathian thil siam dang te duat leh ngaipawimawh tur kan nih te, kan inkungkaihna a that loh chuan a tuartu chu mihringte bawk kan ni tih kan zir chhuak thei hlauh ila aw! He hun khirh leh thawpik thlak hi tuarna phena malsawmna a ni ngei ang.

3. He hripui laka kan dam khawchhuah theihnan kan inpuih tawn a ngai. Chu chu khawvel pawh hian a hria a, an inpuitawn mek a ni. Cuba sawrkar-in an doctor thiam rual engemaw zat an nunna thapa Italy ram hripui lenna hmuna an rawn tir te kha khawvel hian a theihnghilh thei tawh lo vang. Mizoramah pawh he hun khirh hian zonun zemawi a rawn par tir a. Koh chhuah ngai lovin kan tlangvalte chu Hri do Pawl (Task Force) ah hlawh leh fak leh beisei engmah nei lovin an che chhuak mek a ni. Kan khawtlang mi rethei leh harsa zawk chhuan chham tur tanpuiin kan in dap chhuak a, mi thenkhatten an inluahtute harsat zual chhunga an inluah man te an awl bawk a. Khaw hrang hrangah puanthui thiamten damdawi in leh a mamawhtute tan hmaituamna (mask) a thlawnin an lo thui zel bawk a. Heng thil han hriatte hi a va nuam teh lul em! A takin zonun zemawi 'sem sem dam dam, ei bil thi thi' tih te kan nunpui mek a ni. Kan ram kan him zel theihnan ramri kana lo luh ruk tum lo dang tura an nunna thapa rammu mek kan tlangval pasaltha ang hi khawvel hmun dangah awm ve tak ang i maw le!! Kan pasaltha rual te u, zahna chibai kan buk a che u. Kan himna tura an thiamna hmang mek kan doctor te, nurse-te leh thawktu dangte kan chhuang a che u. Kan ei tur min ngaihtuah saktu an himna leh nun tiderthawng ngam kan driver leh handiman zawng zawng te hi tumahin kan ngainep thiang lo. He hripui leh inkharkhip hian kan inpekna muthlu min kaih thawh sak mek a, zonun ze mawi laimu min phawrhsak mek a ni.

4. He hripui leh inkharkhip kan hman mek hian kan thil ngaihsan leh ngaihlut zawng min thlak sak hial mai thei asin!! Ram changkang apiangah ei leh bar thawkchhuaktute an ngaisang thin. Keini ramah erawh chuan thlan tui far loa sawrkar hnathawkte kan ngaisang thung. Tuna kan harsatna hian kan dam khaw chhuahna atan thingtlang lama lo neiha eizawngte an hlutzia min kawhhmuh mek a, khawpui lam chawmtu an nihzia a rawn pholang mek a ni. Darlung khua te, Maite khua te, Sailam khua leh thingtlang khaw dangte engemaw zat te hian phut let nei hauh lova khawpui mite an duhsakna thlai chawhmeh an pek zozai te kha a va ropui em! Kan hero dik tak chu rim taka thlan tui nena hnathawk thin thingtlang mite an ni e.

5. Kan khawvel chen mekna hi kan hmuh apiang leh a chhuak thar apiang neih ve nghal zel duhna khawvel a ni. Kan ei chak apiang kan taksa tan a that leh that loh ngaihtuah hauh lova ei zawh zel tumna hi kan khawvel chen mekna hri vei (virus!) a ni. Nawmchenna leh nawmsakna uar lutuk chu hnam ralna leh tluk chhiatna bul a ni. Kan inkharkhip mek hian khawsak hautak tak hi kan lo mamawh hran lo ve, mamawh titlem zawnga khawsak thiam pawh kan tlin tho tih min kawhhmuh mek a ni. Kan duh leh mamawh ti tlem zawnga khawsak thiam kan zirna hun remchang a inher chhuakah ngai hlauh thei ila, a va tihzia dawn em!

6. Hripui avanga kan inkharkhip mekna hian ei leh bara kan intodelh a tulzia min zirtir mawlh rawh se. Mi dang thar chhuah leh siam chhuah rin ringawt chu buaina zakhua a thlen thei tih hriaa ei leh bar leh thil siam thenkhat-ah tal te hi chuan intodelh tura hun rangkachak a inher chhuakah pawm ila, kan ram mamawh ei leh bara intodelhna kawnga harhna kan chang a nih ngat chuan a hlu ngawt ang. Kan sawrkar pawh hian mipuite thuawi theihzia te, mipuite theihna sawm khawmin hmasawnna leh intodelhna kawngah thil nasa tak a tih theih tih an hriat a pawimawh hle a ni. Ei leh bara intodelh tur hian tuna kan thlen chin aia hmasawn dan kawng kan zawn pawh hi kan sawrkar mawhphurhna a ni e. Kan ram awl neih te, kan chuktuah huante pawh nasa leh zualin in hmang tangkai teh ang u.

7. He virus te reuh te hian khawvel hi innghahna tur dik min kawh hmuh mek a, Pathian Engkimtitheia chauh lo chu inghahna leh rintlak kan awm lohzia min zirtir mek a ni. Chu chu he khawvel Sawrkar ropui te hian an hre chhuak lo a nih pawhin keini Mizo fate tal hi chuan i hre chiang mawlh teh ang u. Chumi atana a bul tanna pawimawh tak mai chhungkaw hlutna leh pawimawhna chu he hrileng avanga inkharkhip hian min zirtir mek a ni. Mimala Pathian rin hi a tha, chhungkua Pathian rin phei chu a tha leh zual. Kristian chhungkua kan sawi fo a, beihpui pawh kan thlak fo thin kha a takin hmanna tur hun rangkachak a inher chhuak mek e. Kan bul tanna tur chu pawn lam leh biak in lam ni lovin mahni chhungkua theuhah a ni e. A bul kan tan dik tawh chuan a tawp a hmawr bawkna pawh a dik nge nge thin.