Hlâwkna uchuak ûm Mizo Kristiante?

Champhei District khaw tam takah chuan Kuhvarah dan lova lakluha tawlh hi 'crime' a ni lo tih mai a ni tawh lo va, sumdawnna ṭha tak malsawmna ang hialin an sawi tawh an ti. Chu malsawmna chu chung lam aṭanga rawn chhuk ang chuan kei chuan ka ziak ve duh lo va, a pawmtu lam pawm dan chu ka thlaksak thei lo thung ang a, chuti chung chuan hlawkna uchuak kan um avanga kan ram kan sawp chhiat mek laia YMA, Police leh Sorkar an ngawi reng hi kan tu leh fate'n min la dem zui rinna lian tak nen; he thu hi thiam lo chung chungin ka rawn thlasik mau puahpui ve phawng phawng a ni e. Tu pawi kan sawi em lo vang chu.

English chuan 'Illegal' tih a awm a, chu chu 'dan lo' tihna a ni a, dan lova thil tih chu illegal a ni a, dan lova sumdawna lakluh phal loh ram pawn aṭanga lakluh hi smuggling a ni a, chutianga inhnamhnawihte chu smuggler an ni. Chu Smuggling chu Dictionary lam thiam ang tawk tawkin ka han rawn ve a, Oxford Dictionary chuan, "the illegal movement of goods into or out of a country," tiin a dah a, Mizo ṭawng chuan "ramri kana dan lova insumdawn tawnna" tiin emaw, "Ram pawn aṭanga phal loh thil lakluh leh thawnchhuah" ti pawhin kan dah thei ang a, chutah chuan thil tam tak a huam tel a ni.

Smuggling kan tih hian dan lova ralthuam lakluh leh hralhte hi a kâwk a, dan lova sorkar phal loh thil mipui tana pawisa nei miah lova lang rangkachak lakluh leh hralh pawh hi a huam vek a, dan lova ruihhlo lakluh leh hralh chiah hi smuggling hian a huam lo tih hi kan chian a ngai tawh takzet a ni. Chuti a nih si chuan Myanmar aṭanga Mizoram kal tlanga India rama kuhva rah rawn tawlh luh pawh hi dan lova phal loh thil lakluh a nih angin smuggling chu a ni ta a, he thila inhnamhnawih zawng zawngte hi smuggler an ni ve mai dawn lo vem ni le?

A hlawk em avang te, kuhva rah tawlhin kan ram a tihchhiatna kan hriat loh avanga kan sawi mawia kan insawithiam zel dawn a nih chuan rangkachak tawlh luh hian kan ram a tibuai lo zawk lo maw? Rangkachak smuggling hmang ngeia intimilian nia puh theih hi Mizoramah hian an awm ve ta zauh zauh va, heng mite kuhva rah tawlhtute nen hian ruihhlo leh ralthuam tawlh lo ṭheuh ṭheuh a danglamna a awm em ni? Rangkachak phur phei chuan kan kawngpui an rap chhe tel ve lo va, a ṭha zawk hial lo maw? tih zawhnate hi kan mithiam zawkte chhan atan ka rawn zawt a, a hlawk em leh kan ram tana pawi lo tia kan sawi mam zawng zawng hi a thiang ta em ni le? Hei hi kan Police leh CYMA hruaitute ka zawhna ni nghal se, an phal a nih chuan i tawlh sup sup ang u khai.

- Lalrammawia