Quarantine dan zawm ṭhat Mizote himna tur

Mizoramah Covid-19 vei pakhat kan nei, ram dang aṭanga kai nia hriat a ni. Covid-19 hi a natna veite aṭanga inkaichhawn a ni a. He hrileng kan beihna changchangah hian kan State Sorkar hmalakna, tlawmngai pawl hrang hrang leh Task Force te inpekna, mipui kan ṭanrualnate a fakawm hle mai.

Tunah hian lockdown avangin India ram State hrang hrang leh ram pawnah te kan mi leh sa tangkhang tam tak an awm a. Kan Sorkar chuan a hmasain North East State-a tangkhangte lakluh turin ruahmanna a siam a, an lo lut ṭan mek a. State dang leh rampawn aṭangtein kan mi leh sate an lo la haw leh zel dawn a ni. Kan state chhung hi chu tunah chuan he hri lakah fihlim rih mah ila, pawn lam aṭanga lo lut turte hi hri ṭâi darhna thlen theitu tur an nih avangin fimkhur a ngai hle a, chuvangin heng mite tan hian Sorkar chuan dah hran leh khung hrana;  Quarantine turin ruahmanna a siam a. Ṭhenkhat chu mahni in lamah quarantine turte pawh an awmin a rinawm a. A hma aia ṭhaa home /official quarantine kan tihṭhat a ngai a ni.

Mizoram Sorkar chuan March ni 18, 2020 khan Covid-19 vei tamna state aṭanga lo hawte chu home quarantine emaw quarantine na tura siamah dah hran turin thu a chhuah a. Ministry of Health and Family welfare, Government of India chuan home quarantine tih dan tur fel takin a siam a. He guideline ah hian quarantine-na room chuan bath room hran a nei tur tih te, thleng, no inhman ṭawm loh, towel leh bedding te pawh a hrang tur a ni tih te a ni a. Tin, quarantine room chu 1%  sodium hypochlorite solution hmanga room disinfect ṭhin tur tihte a ni. Dr Eric Zomawia chuan Mizo Covid-19 vei hmasa ber hnenah India rama a lo haw hmain he guideline hi a thawn tih a sawi a. Amah hi lehkhathiam tak a ni a, he guideline hi uluk leh fimkhur taka a zawm avang ni ngei tur a ni, a chhungte leh midang a kai darh lo niin a lang. Mi ṭhenkhat chuan an quarantine chhungin he guideline hi an zawm ṭha lova, he natna vei lo; vei phah lo awm palh hlauh se chuan awlsam tein an chhungte bakah midangte pawh an kaiin he hri theh darhtu an ni thei dawn a ni.

Tuna lo thleng tharho tan Sorkarin quarantine na tur a buatsaihna hmunah an vaiin an leng kher lo ang a, home quarantine tur te pawh an awm ang. Chubakah Ministry of Health and Family Welfare chuan Covid-19 na vak lova veite chu in lama enkawl (home quarantine) dan a chhuah a, chuvangin a veite pawh a ṭul dan azirin in lama enkawl a la ngai dawn a ni. Quarantine tur hote hian quarantine  dan uluk taka an zawm ngei a ngai a ni. Heng mite zinga dan zawm lo hripui lo vei an awm palh hlauh chuan awlsam tein nasa takin hri a ṭâi darh mai dawn a ni. Chuvangin Sorkar hian Ministry of Health, Govt of India Guideline hi zawm a nih ngei theih nan hma la se a duhawm khawp ang.Quarantine-a awm mek te pawhin kan chhungkaw himna, khawtlang himna tih hre rânin theihtawpa he guideline zawm hi kan tihmakmawh a ni tih kan hriat a ṭha khawp mai.

Home quarantine leh Isolation a hlawhtlin theih nana ṭha ka tih te ka han tarlang ve e :

1)  Sorkar hian District tinah quarantine-a awm mek te enzui tur District Monitoring Cell din se la, ni tin Monitoring Cell member ten quarantine a awm mek te'n dan an zawm leh zawm loh monitor se la, tlaiah Chairman hnenah report submit se la. Dan zawm lo chu action lak nghal ni se la.

2) State Level Monitoring Committee on Quarantine din se la, he committee hian district tin aṭanga report review se la, sorkarin Quarantine a siamnaa awm hote pawhin dan an zawm 

ṭha em? Facility tha an nei em tih te pawh en dik ṭhin se la. Action lak ngai apiang la turin hma la se la. Heng report te hi Chief Secretary, Minister In Charge, Chief Minister hnenah pu lut ṭhin se la.  

3) Tunah hian lockdown avangin sorkar hnathawk tam zawk inah kan awm a, heng mite hi monitor-tu tur atan hmang se la.

4) Hemi monitoring atan hian software/apps state dang siamsa emaw, mahni develop hmang se la.

5) Task Force leh veng mipuite pawhin home  quarantine ti ṭha lote chu thuneitute hnenah report hreh lo ila.

6) Tunah hian Aizawl Market-ah Ministry of Health-in room disinfect-na tura a recommend sodium hypochlorite solution lei tur avang, a tlukpui market-a lei mai tur awmsa kan Medical mi thiam ten quarantine nei mek te hrilh se la.Theih hram chuan Ministry of Health ina hman tura a tih hi hman ni se la.

He natna laka Zoram mipuite kan himna tur chu Home/Official quarantine kan tihthat leh that lohah a innghat dawn a ni. Zoram tang fan fan.