Pawisa sem ni lovin pawisa thawh

Kan MPF-in an duh loh leh do tlat chu MLA leh MP inthlan dawn vela pawisa sem a ni. An duh loh thu an aupui luai luai a, tunlai hian langsar takin pawisa hi sem lo mahse an inthawh siak ṭan tawh zawk lo maw? Hei hi pawisa sem nen a danglam lo kan ti dawn nge, a danglama mahse kan sawisel duh lo zawk?

Miin MLA-a din duhna thinlung a put aṭangin bial an vil ṭan a, an bial tur ang a chian deuh chuan chu bial tan chuan an pawisa sengin thil tam tak an tihsak nghal zawt zawt mai. Heng mite hi ‘bial vil’ angin an inngai ang a, hei hi bial vil tia hming mawi tak kan puttir lai hian ‘pre paid’ hmanga he bial mipuite lei tumtu an ni zawk lo maw?

Han chhut han chhut hian kan kal dan hi ngaih a ṭha lo asin. Party pakhat chuan an MLA hual pakhat chu ṭha thawkhat mahse an party hminga ding duh ‘hausa zawk’ an hmuh avangin tun hnaiah an candidate hual an thlak an ni. MLA-a din tum mi hausa chhungkuaa sei lian pakhat chuan tunah hian a bial hualah thil a ti tlut tlut a, ṭhalaite thil tiamin eng eng emaw an lawm zawng tur zawngin pawisa a seng nasa mai an tia nih chu.

Kan chhut chian chuan kan NLUP danpui dan pawh hi chu lam hawi tho chu a ni. Kan MLA inthlang tur hi “A nei nung nung a seng huai huai,” tih ni dawn tlatin ka hria, kan candidate zawn dan aṭang hian.

Pawisa ngah, an pawisa neih dan chhui chian dawl lo, tun hmaa mi hming ṭha lote hi chu ṭhangtharte hian lo hnualsuat hlauh se ka ti hle mai.

- Lalremruata