VIRGIN HLOH!

Mizo te hi chhungkua a ‘sex’ lam sawi hreh leh inzirtir hreh tak, mahse pawn lamah erawh ‘sex’ lam sawi nasa kan ni a, kan fiamthu thawhah pawh hmun pawimawh tak a chang. Mizo te chang ni lo mihring, mi pangngai tawh phawt chuan sex hi a ngaihtuah a, a nunpui a, a hmang bawk ṭhin.

‘Sex’ hi Pathian in mihring te tan a siam a ni a, mipa leh hmeichhia hi sex hmang dun tura Pathian siam kan ni. Chuvangin, sex sawi hi sual a ni lo a, Pathian thu nen uluk taka kan inzirtir hi kan tihtur leh kan mawhphurhna a ni.

Jeremia 31:21 ah khan Pathianin Israel chu nula thiang­hlim (virgin) angin a ko a. Tirkoh Paula chuan ‘virginity’ chu tharau lama kan thiang­hlimna chhinchhiahna anga hmangin II Korinth 11:2 ah khan Lal Isua tana neih tlak nupui ‘virgin’ ni turin min hual thu kan hmu. Kohhranin kan inzirtirna angin Hebrai 13:4 ah khan inneih hmaa ‘sex’ hmang te leh uire te chu Pathianin an chungthu a ngaihtuah dawn tih kan hmu.

Chuti ang chuan Bible-ah hian ‘virginity’ hlutna te, inneih hmaa sex hman hi kan tih loh tur a nih thu te kan hmu a, Kohhranin min zirtir bawk. Pathian pawhin ‘virginity’ chu a ngai hlu a, a fapa Lal Isua pianna tur pawhin nula ‘virgin’ Mari a thlang.

Virgin loh rau rau-ah mipa aiin hmeichhe tan a hreawm zawk ang a, chuvangin hmeichhe thlavang hauh chungin kan sawi ang. Hmeichhe virgin loh tirtu hi mipa kan nih avangin kan indah awl thei chuang lo.

Zep nak emaw, Mizo sex video leak out te hi mi nawlpui chuan kan en deuh fur zelin a rinawm. Chuta ka rilrua lo awm chu mipa te hian kan mutpui hmeichhia te hi kan timualpho takzet tih hi a ni. Hmeichhia chuan innghahna tlakah ngaiin mipa lakah chuan a inpumpek a, mahse a tawpah dem leh mualpho chiah an hlawh leh ṭhin.

Zirchianna chu ka neih hauh lo nain hmeichhia hi kum 14-22 inkarah hian an ‘virgin’ an hloh tam ber hun lai a nih ka ring. Hetih hun lai hi an duh tawh mipa chu an duh em em hun lai leh enge emaw tawn ve chakna hun a ni. Hetih hun laia an bialpa te a zirin sex an hman leh hman loh hi thui tak a innghat ang. Hmeichhia chu sex lama harhvang tak a nih chuan mipa chauh kan dem thei lo ang.

Pawi ta em em chu a tam zawk hmeichhia te hian kan thianghlimna kan hloh tawh chuan a leh peka ‘sex’ hman fo hi hrehlohna kan nei tawh tlat zel. Facebook, Instagram etc vela thlalak sexy tak tak upload a post ṭhin te hi kawm chian tak tak chuan sex lo hmang tawh, virgin tawh lo hi an lo nih duh khawp mai! Chutih rualin Social media a thlalak sexy nei lo mah se virgin si lo tam tak an awm bawk!

Hmeichhia te hian kan virgin kan hloh tawh chuan mipa hi rin leh harsa kan tih tawh ṭhin - innei si loa min kalsan leh si a nih chuan! Chubakah kan sawi tak ang khan kan insiam ṭha fe a nih loh chuan kan hmalam hun zel a kan ngaihzawngte nen pawh sex hman loh hi thil har tak a ni tawh a, sim hlen ta an awm ṭeuh rualin sex hman pawi ti tawh vak lo mi engemawzat an awm pha bawk.

Tun laiah mi kan ‘frank’ tawh a, kan inngaihzawn dawnah kan ‘virgin’ leh virgin loh kan inzawt hreh lem lo. Chungah chuan a bikin hmeichhe tan dawt sawi hi a theih loh tluk a ni - physical takin virgin leh virgin loh hi a hriat theih tlat avangin! Kan virgin tawh lo a nih chuan kan hmalam hun hi thui tak a hril tlat tawh zel a ni.

Mipa te pawhin kan neih duh loh tur hi chu an thiang­hlimna (virginity) hi i tihchhiatsak tawh lo ang u. Tuna tan mai an nun kan ti chhe lo a, an hmalam hun thlengin an nun hi kan tichhia a ni. Mipa dang an neih lehna turah harsatna tam tak kan siam sak a, inneih hmaa sex hman zel pawi tihlohna an neih phah a, kan sawi ang aia thui hian an nun kan tihchhiatsak tlat a ni.

Hmeichhiate mawlh hian i hre thar ang u - sex min hmanpui tumtu zaa sawmriat aia tam mipa hi chuan min hmangaih tak tak lo tih pawm tawp mai tur. In lo tih dik loh pawhin virgin hloh ai chuan a la ṭha hrim hrim! Mipa in kan hmangaiha kan neih duh tak tak te hi chu an virgin hawn sak phet kan tum ngai lo. Chuti anga hawng duh tlat, inneih hmaa sex hmang duh tlat bialpa i tawng a nih chuan fimkhur hle ang che!

Kan virgin kan hloh rual hian kan taksa mai ni lo kan rilru, kan zahawmna thlengin kan hloh a ni. Kan virginity kan hlan hma hian vawikhat tal in ngaihtuah nawn hram ang u. Virgin hloh hian ken tel tam tak a nei a, Pathian thu kan awih loh piah lamah kan hmalam hun zel kan tichhia a ni. Kan sim loh phei chuan AIDS natna thlenga kai thei leh thehdarhtu kan ni thei.

I virgin emaw virgin lo emaw, Lal Isua’n a hmangaih che. A ta ni turin nung la, nang­mah hmangaihtu, i nihna ang anga pawmtu leh hmangaihtu che a pe ang che.

- Rinfela Zadeng