Engnge i duh zawk? Dikna nge hlemhletna?

Kum 30 zet kan ram hian hlemhletna avangin kan politics kan lo tihmingchhe tawh. Chumi rah chu tunah hian kan ram leh mipuiin kan tuar mek a nih hi.

Kan politician-ten ram politics khel lovin Party politic, bazar politic an khel lo thei lo va, Politician te leh an zar zo phak te, sorkar hnathawkte an hausa thur thur a, mipui vantlang erawh BPL lamah kan pung ve thur thur mai a nih hi.

Tuna kan kal dan, politic kan ngaihdan leh kan system pang­ngai hi chuan engtikah mah ram hmasawn kan ni ngai dawn lo. Mizo Union a lo din aṭanga vawiin hi kum tam a ni ta, chung hunlaia hnam mawl, Arunachal State lo ni ta te kha, kan nau en em em a, kan nuihzat ṭhin a nih kha. Tunah chuan an thawh chhuah electric power te chu kan va awt ta ve le! Kan Politician-te dem palh a awl mah se dem tur an ni lo.

Tunlaia kan MLA rualte phei chu mi ṭha ber ber te an ni. ‘Mi ṭha’ han tih ngawt pawh hi a lo ni lo; kan kalphung, kan system-in a zir tlat loh chuan a tihngaihna a awm lo. Tunah hian kan ṭha tawk lo a ni tih kan hre ṭheuh mah se, tuna kan sorkar ding lai leh sorkarna lo siam tawh party te hian system thlak, tihdanglam an la tum chuang lo.

An thiam lo pawh a ni lo, an phal lo a ni ber e. Chuvangin, kan ramin hmasawn tak tak se, mipui vantlang pawhin hma sawn tak tak se kan tih chuan system thar ṭha zawk siam duh tuten thuneihna an chan a ṭul ta a ni ber.

Engvanginnge hre reng si a system an thlak phal loh? Kan ram politic hi chu, miten an sawi ṭhin angin, ‘bazar politic’ a ni a, dan ang ni deuh reuh sia sum pawhpen a sam a, a awl bawk a, hlawk pui thei te tan a hlawk em a ni. Entirna pakhat chauh - MLA pakhat chu By-Election-ah a in candidate a, a thil neih a hausakna declare-ah Rs. 50,000/- a ziak a, term chanve a MLA ve a, election lo awm leh turah a ding leh a, a hausakna declare-ah chuan Rs 60,00,000/- a ziak thei daih tawh a ni. Kum hnih leh a chanve chhunga cheng nuaih sawm ruk lo neih hman chu thil hlawk tak a ni.

He MLA hi MLA corrupt zingah tuman an sawi ngai lo. Hetiang system hi a titheitu tan han kal san phal chi a ni lo, dem ngawt tur pawh a ni lo, mi tute pawhin a hlawk chu kan duh ṭheuh a lawm!

Amaherawhchu, Kristian ram kan ni a, Kristiante tan chuan Pathian lam kan hawi chuan Pathian, dikna, rinawmna, hmangaihna Pathian ringtute tan chuan hetiang zela kal tur kan ni lo tih loh theih a ni lo. Chuvang chuan mipui pawl a lo piang ta a ni e. Tichuan unau duhtakte u, a thupuia kan han tarlan ang hian i duh zawk thlang mai rawh le.

- Rev. Robawiha