A VA UIAWM THIN VE AW

Sakawrhmuituai tlang Skywalk leh Chaltlang aṭanga Durtlang Ropeway chu inthlung ruah mai se chu. Internet-a kan lo hmuh ṭhin, mi ramin tourist hipna'na an hman kha, kan lo nei ve tawh ang a, kan tourist income a pung sawt ang a, ṭhangtharte tan rohlu kan hnutchhiah dawn bawk. Thil ṭha tak a nih vei nen, a zuzi leh mai dawn hian a lang tlat a, uiawm tak a ni.

SUM KAWNG BO?
He project atana sum dah hi a tlem lo khawp mai, Chaltlang aṭanga Durtlang inkar ropeway siam nan Rs. 2482.58 lakh tel daih a ni. Central in Rs. 1241.59 lakh a pe chhuak tawh a, Mizoram Sorkar chuan Rs. 1317.8 contractor hnenah a pe chhuak der tawh bawk. Sakawrhmuituai tlanga Skywalk siam tur project-ah hian, Rs. 485. Lakh zet a ni bawk. A tam hem hem asin.

Chutih laiin an hnathawh kan hmuh theih awmchhun chu, cement ban hlui ruhrel ding bak hmuh tur a awm lo. A khawl ropui order-na lamah sum a kal ṭeuh an ti. Chhui zel tlak a la ni em le?

He hna hi hmalak zel a ni nge ni lo tih chiang lovin, party pahnih an inpuhmawh tawn a, mipui bum nan game an play mai mai ang tih hlauhawm tak a ni.

TU RAWT NGE?
He project hi kan officer-te leh ram hruaitute thluak aṭanga lo chhuak pawh a ni lo. Central project, Swadas Dharsan project daih a ni. Contractor consultancy farm-hoin, ministry lamah an lo bawhzui a, he project pumpui atan hian, vaibelchhe 99 zet central lamin an lo pawmsak diam tawh a. Hna te nau neuh neuh chu thawh a ni tawh a, skywalk leh ropeway erawh chu, inpuhmawh zawngin kan kal zel dawn ta nge a hriat ta loh.

Development atan hian central hian min duat ve khawp mai a, kan Fanghma no ei theih development project a nih vang em ni, a hna bawhzuina leh vilna lam a chiang lo vel nuaih mai a, ram hmangaih thinlung aṭang chuan hahthlak tak a ni.

TEIREI LEI PAWH
Zamuang leh Bairabi inkar Teirei lei, vai contractor siam mek pawh, Rs.210 lakh project a ni. PWD lam chuan a hna a chhiat vanga stay anga an sawi laiin contractor chuan, PWD-in a drawing vawi 3 lai min tihdanglamsak vang tiin an ṭang ve thung.

Tun hnaiah kan journalist-te a hmunah zuk kalin, an hna chhiatzia video an rawn thehdarh kan lo hmu a. Karei karei, an hna chhiatzia mai chu, tlaklei vawmkhawm ang mai, kut lawng pawha hai chim ham ham theih a ni maw le! An rod hman lah chu a khat phuar mai bawk si, han stay loh chi ziazang a ni lo.

Contractor-ten hna an thawh laiin, engineer viltu ṭha an awm lo nge? Ram rohlu tur, central pawisa kan dawnte hi chu, phur tak leh hna ṭha taka thawh a nih theih nan, lo vil hliau hliau tur kan nih laiin, hna laklawha stay order chhuah leh ngaia kan kal chuan, sum tam tak sen ral a lo ni tawh a, chhunzawm leh a harsa ṭalh tawh ṭhin. Teirei lei pawh hi a zuzi leh mai ang tih hlauhawm tak a ni.

DELHI SORKAR CHU NI SE
Ram hmasawnna lam sawi chuan, Delhi AAP sorkar khu mitthlaah an lo lang vat zel mai, hmangaih taka ram enkawltu chet velna lo hriat ve chuan, kan ram riangte hi min rawn hmangaihsak ve se tih a awl rum rum mai. Anni chuan flyover ropui lutuk an siam chu, budget estimate aia vaibelchhe ruka tlemte'n an zo thei a, vaibelchhia chu tam deuh asin. Keini ve chu a tira senso tur ruahman aia tam zelin kan zo hram hram ṭhin a ni si a. Depde an tih hi keimahniah a bet tawh zawk emaw tih mai tur a ni ta.

Ram rohlu tur, ṭha taka bawhzui leh vil zui a nih loh vanga kan chan a nih vaih chuan, ṭhangthar lo awm zelten min la rawn dem ngei ang a, a hun laia mawhphurtute thlarau pawh, anchhia an lawh ngei ang le.

- Lalrinliana Colney