Duhtawk tura ngenna zahawm

Health Minister Dr R Lalthangliana'n Chief Minister Pu Zoramthanga nen an inkar boruak chu a ṭha hle tih a sawi chhuah khan Covid-19 hi politics lama inbeihna atan hman a duh loh thu a sawi a. He inbeihna hi duhtawk tawh ang u, a tih kha political party leh party mi leh sate pawhin i zawm vek ang u khai tiin rawtna i han siam teh ang. 

He thu lo irh chhuah­na hi kan chhui kan chhui chuan MNF Party in siksawi vang kha a ni kan ti lo thei lovang a, a chhan chu ruling party an nih chiah khan a hmaa an hruaitu lawk tak tak pahnih Vice President Dr R Lalthangliana leh Pu Tlanghmingthanga Ex Minister chu Vice President aṭanga chawlhtir nghal ṭhawt an ni a, boruak a siam nasa mai tihte leh miin an sawi zui nasa tihte pawh kan zavaiin kan la hre chiang ang a. Kha kha chu hri len hma politics kal vêl a ni tih hi kan thlir dan tur a ni. Tin, party chhung insiksawi hi boruak chhiat vang ni lovin hnathawh an tum tak tak vang zawk a nih a rinawm a ni. 

WhatsApp group pakhatah phei chuan Chief Minister leh a pawlte chu exercise la chin zawng kha an ni a, Dr Thangtea chu exercise pawh a lak ve duh loh kha tihte a inziak a, a awihawm loh piah lamah a nuihzatthlak zawk mah a ni. Thil hre chiang lo zeldin thubawl ziah ching hi an awm a ni. 

Khawvel chawk buaitu, USA meuh pawh ti mangang thei khawpa hri hlauhawm Corona­virus a len hnu hi chuan kan khawvel hi a danglam zo tawh tih hi kan hriat chian a ṭha ang. 

Coronavirus a lo luh hnu chuan rel pawh an tlan thei tawh lova thlawh­theihna pawh a thlawk thei tawh lova,  dawr zawng zawng a inkhar tawh a, office bakah Biakin zawng zawng pawh an khar tawh a ni. Inkhel pawh an chawl ṭhap tawh tih hre rengin politics lama hri len hma thil kha chu tawp ve tawh rawh se. 

Health Minister in Chief Minister nen an inkarah khi a awm anga puhna kha a chhang tawh tih te pawh kan lo hmù ta a, keini rin thu lo sawi ve mai mai ai chuan a chiang tawh daih zawk a ni si a. Chief Minister nen an inzui rei tawh thu a sawi leh CM thil phal tak kan nei a tih kha a rintlak a ni. 

WhatsApp leh Facebook lama a ka kaw naran thu sawi hi chu i forward zui zel tawh lo ang u. Health Minister ngenna zahawm tak Covid-19 hi politics khelhna atan i hmang lo ang u, a tih kha mipui pawhin i zawm vek ang u khai.