DAM PHAWT A ṬHA E

Kan naupan laia kan retheih dan ka sawi hian ka nupui fanaute an ṭap ṭep ṭhin! Ka insawi khawngaihthlak thiam ve bawk a! 

Mi khawngaihna kha kan va'n dawng hnem tak em aw, ei leh bar, silh leh fenah khan! Dil erawh chu kan dil hranpa lo. Van khawngaihna lo luang liam kha lawm takin kan dawng ṭhin. Tlawma lak theih a ni lo, kan nei miau si lo a. Dawng duh lo khawpa chapo tur kan awm hek lo! 

Rethei tê khan chung­lamin min zuah ve zel a, kan dam ve tlat a. A khawngaihna avang khan kan hrisel phian lehnghal, rilru lam thlengin! Rual kan awt bik lo a, depression kan hre lo a, anxiety in min tibuai ngai lo! 

Curfew a awm ṭhin a (tunlai lockdown ang mai hi, Remna Ni awm hma kha a nia), CRP kha kan va hlau thei tak! Thu lah kan awih, hlauhna avang khan a niang! Kan ṭhenawmah, ruahsur laia curfew bawhchhiaa chhuak, CRP-in an silai kawma an chhut hrep lai kha ka mitthlaah a la cham reng. Thuawih lo an chhu hrep lai kha, thuawih taka ina tawmte khan him pialin khan kan thlir ringawt! Tih theih dang awm hek lo le! 

Hei hi ka lo hre chhuak ta. Rethei viau mah ila dam phawt hi a lo ṭha a ni. Daktawr te ka lo nih ve tak hial hi! Thuawihte kha kan lo him mai a, dawih deuhte kha a hunlai azirin a ṭha ve tlat. CRP kutthlak kan tuar lo nge nge a!

Hriselna hi a va hlu em! Covid19 kai hi ka hlau viau mai, kan in chhunga thawk chhuak awm chhun ka ni si! Keini ang tan hian natna hi hlauh zual tur a lo ni. Dam loh hi a va hautak em! Ka thih chuan a pawi dawn em mai, ka nupui fanaute tan hian. Hriselna atana pawi tur hi mi hausaten an lo ti bik a nih pawhin, 'kei zawngin kan retheih avangin ka ti ve lo' tih ngam a ngai fo bik. 

Dam phawt a ṭha. "Sakeibaknei thi ai chuan ui nung takngial pawh a ṭha zawk si' a tih kha, Thuhriltupa-in. Mi ropui leh hausa thi tawh ai chuan, anni nena tehkhina ui tluk lek pawh hi kan la dam chuan, kan la ṭangkai zawk, tun atan chuan. 'Mi nungdamte zinga la telte tan chuan beiseina a la awm si a'. 

May ni 4 aṭang hian kan zalen belh hret mai thei, lockdown hming pu chung hian. Kan la zalen famkim dawn rih lo. 

Hun harsa bika kan awm lai hian hun harsa bik kan tawng tih hi pawm tur a ni a. Hmana mi anga awm theih a ni lo a, nunphung thlak a ngai rih a nih hi! 

Rethei hret rih mah ila, hrehawm deuh mahse, dam phawt hi a ṭha ngai e.