Buhfai dahna tur kan la nei

Tlem lai deuh aṭang khan thingtlang lamah buh thar hlawk lohzia hriaten a aia hlawk nia lang thlai chin kan uar thar a, kan thlai hralhna in buh ei tur chu kan lei ve mai ṭhin. Tunah hripui a lo leng a, kan ramah in kharkhipna kan hmang a, vanneia siamin thingtlang lamah chuan hna kan thawk thei a, khawpui lama awm, nitin eichawp zawnga inhlawhfa ṭhinte an khawngaihthlak mang e. 

Hetia kan in kharkhip mek lai hian ram hruaitu lu lam chu an buai a, mipui mamawh te ngaih­tuahin an vir vat vat reng a, an chhuanawm khawp mai. Chutiang bawkin ramri dep lama kan ṭhalai puiten chauh leh hah dawn loin zoram tan mutmu pawh tuah ṭha thei loin ramri-ah ral an veng a.  

Kan lo hriat danin buhfai dahkhawlna inpui a khat tawh a, buhfai phur motor lianten dahna tur nei loin an nghak ṭhup tih thawm kan lo hria a, kan lawm rualin kan lung a va chhe em. Keini thingtlang lamah chuan buhfai dawr a awm ve lo a, duh hun huna lei tur a awm hek lo. Buhfai bag khat lei hi thil awlai a ni lo a ni. Khawpui lama motor kal tur remchang zawn a ngai a, lockdown a vangin lirthei tlan a tlem si. Motor kal chhunte lah pawimawh tawp an ni hlawm a, buhfai an phur tel thei ang em tih zawh a, an lo phal hlauh chuan kan in chah ve a. Aizawla an kalna hmunah dawr hawn an lo phal chuan an rawn lei ve thei chauh ṭhin. Buhfai bag khat chauh lei tur hian pawisa chauh ni lo, rilru leh tha sen a ngai nasa asin.

Chutia kan zoram buhzem a khah tawh laia eng vanga thingtlang lama harsa reng bik si nge kan nih? Thingtlang khaw tin hian YMA hall emaw community hall emaw kan nei deuh vek a, chung hmun te chu buhfai chhek khawl nan kan phal vek awm e. Hetia buhfai dahna tur nei lo, kawnga ding tlar pet put kan hmuh hian kan chil a put asin. Eng tia rei nge he hripui vang hian harsatna kan tawh dawn kan hre si lo. 

Thlawhhma han la zau ve ngawt mah ila tuna ei tur kan neih si loh chuan kan thawk thei dawn chuang bawk si lo. Thingtlang mite tan hian chhekkhawl dan kawng te hi a awm mial lo maw? Mahni kawtkai ngei maiah buhfai lei ve theih a va chakawm ve aw, tun ang reng hi chuan kan thla a muang thei lo a ni. 

Sawrkar hian ruahmanna thar siamin, thingtlang miten tun hripui vanga harsatna kan tawrh chhung leh, buhfai chhekkhawlna tur neih tawh loh vanga kawnga buhfai phur motor tangkhang mai maite hi thingtlang miten kawtkaia awlsam zawka kan lei theih nan ruahmanna min siamsak sela. Ramri dep kan unaute phei chu hna thawk tur chhungkaw pa leh ṭhalai mipate ral vengin an rammu deuh vek si. Nu ber tan buhfai ngaihtuah a harsat hun a thleng thei. 

Hetia kawngpuia tangkhang mai mai ai chuan, mahni kawtkaia lei tur nei lo chu sawi loh, dah khawl tur pawh nei mang lo thingtlang mite tana hman ṭangkai dan ngaihtuah ran a ngai a ni.