DAWN TISEI

Berawlui lung­lakna hmun a chim a, nunna hlu tak chan pali zinga pahnih chu naupang an ni. Sorkar, pawl, kohhran leh mimal aṭangin suntu leh raltu an awm nual a, ralna sum tling­khawm pawh nuai chuang a ni awm e.

Mahse, duhthlan tur ni se lusun chhungte khan sum aiin nunna an thlang zawkin a rinawm. Vanduaina lo thlen hma khan an hnathawhna chu a him tawk lo a tih hmutute pawh an awm a; mahse sahimnna tura an thurawnin a lunglakna hmun neitute thinlunga thleng thui vak lo a ni awm e. Se bo hnua sekawng kha rang chauh a ni e, mi pali nunna a liam ta.

Lunglakna hmun neitu chungah sor­karin dan a lekkawh aṭang hian midangte tan pawh hnathawk­tute himna a pawi­mawhzia hriat thar a ṭul. Lengpui daiah mi pakhat pawh a lung lakna hmunah chesualin a boral a; eng ang chiahin nge suntu leh raltu a neih ve hriat a ni meuh lo. Hnathawhna hmun chu eng hna pawh ni se mihring nunna atan a him tawk tur a ni.

Lunglawn veng Lunglei-ah lei tawlhin in pakhat hnawlin nunna chan 10 a la te kha a va pawi em. Chenna in sakna tur hmun te pawh hi him tawk lo a va tam em! Aizawl veng tam tak a in sakna hmun leh sak dan te thlir chuan 2013 a Laipuitlang lei tawlh ang kha Aizawl leh khaw dangah pawh a thlen theihna tur a awm nualin a lang.

Pangzawl bula Saiha night bus chetsual chhan pawh kha Haulawng - Lunglei inkar kawng chhe lutuk an helna lama chesual an ni ti ila a dik ve tho ang. Turini lei mi pahnihin an zawh chim avanga pakhat a thi pawh kha a mak a ni. Power & Electricity Depart­ment chuan hlauhawm chhinchhiahna tarin an hung ṭhin a nih hi.

Naupang tui a tla hlum an awm fo mai hi puitling zawkte tan ngaihtuah chian a ngai. Kum 2014 aṭanga June, 2018 chhung khan Mizoram naupang duhawm tak tak 24 laiin nunna an chan. Heng chetsualna thleng tam zawk hi naupangte fimkhur loh leh at vang chu ni tho mahse tuikhuah neitute, kawnglaitute leh hnathawktute fimkhur tawk loh vang a ni zawkin a lang.

Ramin hma a sawn chuan hkawng laih, insak, tuikhuah, lung lak leh thil dang eng pawh ni se, hna­thawhna hmun chu thawktute tan a him tawk tur a ni a; chhiatna thleng thei laka invent leh enkawlna hmanrua te pawh a hmuna zirin neih tur a awm ang.

‘Hna thawhna hmun­hma kha mi­dangte tan a him tawk em’ tih te pawh ngaihtuah tel a ngai. A bikin nunna atana him leh him lo tur pawh la hre phak lo naupangte tan a him tawk em tih pawh ngaihtuah tel a ngai hle ang.

Mizoram hian mihring hriselna leh himna kawngah tun aia ngaihtuhna hman uluk a ngai. Naupangte zalen leh him zawka an awm theihna tur­in Zoram mipuiin mawhphurhna sang tak kan nei e.

- H. Lalchhuanvela