A PASAL NEIH NI TURAH MO KAWR AIAH PPE HÂK A THLANG!

Kannur a Pariyaram Medical College Hospital a thawk Dr. Shifa M. Mohammed chuan a pasal neih ni turah mo kawr aiin personal protective equipment (PPE) hâk a thlang a, pasal neih aiin 'nunna chhanhim' a dah pawimawh zawk.

Tunlai hri lêng avangin Kerala a doctor kum 23 mi pawh hi a buai ve hle a. March 29, 2020 kha a pasal neih ni tura ruahman a ni a. Dubai a khawsa tlangval sumdawng Anus Mohammad-a nen chuan innei turin engkim an peih fel tawh a ni.

Mahse Dr. Shifa hian a damlo enkawlte a ngaihtuah a, a pasal tur leh a chhûngte hnenah chuan, "Inneihna chu lo nghâk hret pawh ni ila a pawi lo, mahse ka damlo enkawl talbuai mêkte erawh hi chuanin min nghâk reng thei lo a ni," tiin a pasal neih tur chu sawn rih mai a ngên a, a pasal tur leh a chhungte pawh chuanin rem an tihsak ta a ni.

An inneih ni tur chu a lo thleng ta a, Dr. Shifa-i chu Covid-19 an enkawl mekte buaipui in a thuam mawi tak PPE nena inthuamin Pariyaram Medical College Hospital ah chuan buai êm êm in a hun a hmang ta a. A thawhpuiten hrethiamin pasal neiin chawl pawh nise kêp an inhuam tehreng nen Kannur nula chuan pasal neih aiin nunna chhan a dah pawimawh ta rih zâwk a ni.

Hemi chungchang an zawhin Dr. Shifa-i chuan engmah midangte aia a tih ṭhat bikna a awm loh thu sawiin, "Thil ropui tak engmah ka ti lem lo. Ka hna chanpual ka hlen mai chauh a ni e. Ka chanchin hi sawi vak hi a ṭulna a awm lova, keimah ang tho a inneih sawn an tam a, chung zinga pakhat chu ka ni ve mai," a ti.

A pasal neih ni turah hian Covid-19 kaite enkawlna ward-ah nilengin hun a hmang a, a thawhpui doctor dangte chuan mo kawr manto tak aia PPE a ha chu a thawmhnaw mawi ber a nih thu an hrilh niin Dr. Shifa-i hian a sawi. 

Dr. Shifa-i pa Mukkam Mohammed chuan a fanu thutlukna chungchang chu sawiin, "Nula tute tân pawh hian pasal neih hi chu thil pawimawh tak a ni a. Mahse kan fanu hian ama mimal hmakhua ringawt chauh dah pawimawh lova midangte a ngaihsakna leh a hna a dah pawimawh hmasa zawk hi keini pawhin kan zah sak a, chuvang chuan inneih sawn hlat a rawtna pawh ihe lovin kan pawmpui nghâl a ni," a ti.

Kerala sawrkar hian Dr. Shifa-i thawhna damdawiin Pariyaram Medical College Hospital hi Covid-19 hri kaite enkawlna hmun atana an buatsaih deuh bîk a ni a. Dr. Shifa-i'n pasal neih aia damlo enkawl a dah pawimawh hmasa hian Kannur nula hi mi tam tak ngaihsan a hlawh phah a, a chanchin hi India ram chauh ni lovin khawvel ram hrang hranga chanchinbumiten an ziak a, hei keini thleng thleng pawhin a chanchinte kan lo chhiar in ka lo ziak ve ta a nih hi.