Durtlang-Leitan inkarah zu
Mizorama Covid-19 hripui lêng mek la ziaawm thei lo mah se, nunphung a pangngai titih tawh a, chhun lamah phei chuan hripui lên hma ang chiah kha a ni tawh ber mai a. Mipui pawh kan zalen ta hle a, ṭhian hoa thil tih khawm leh khawi khawi emawa lêng ho pawh mi tam tak hmuh tur an awm leh tawh. Heng karah hian mipui lam hian kan zalenna hi hman thiam a ṭul viau mai.
Pathianni chhun lamah pawh chhuahvah chungchangah inkhuahkhirhna a awm tawh lo a, duh duhna hmunah kan kal thei tawh. Chuvang chu ni maw, khatia inthlahdul a nih tak aṭang khan Bawngkawn-Durtlang kawng, Leitan thlen chhoh hma deuhah hian Pathianni apiang hian kawngpui sira kea kalna (footpath)-ah hian ualau taka zu in hmuh tur an awm ta deuh ziah a. Hmun ualau, mi tam tak kaltlangna kawngpui sir mai a nih avangin a mawi lo khawp mai a, a zahthlak tel bawk.
Pathianni chhun leh tlai vela (zan lamah pawh a ni tho) Leitan thlang deuh kawngpui sir footpath-a zu in an awm ziah hi tihreh dan awm se a duhawm khawp mai. Heng footpath-ah hian kea kal an awm ve reng a, kea kalte tan zu lo inte chu paltlang a huphurhawm duh viau mai a, hmeichhe tan a hrehawm lehzual.
Zu khapna rama hetianga kawngpui lûn tak sir maia ualau taka zuin an awm ṭhin hi a dik lo hrim hrim bawk a. Ualau takin zu khap hlamchhamzia an tarlang a ni ber mai a; sorkar tan pawh inenfiahna a ni ang. Tun hnaiah Rangvamual leh Phunchawng vela zu zuarte man si lo a, mahni zu in tur zuk leite an let leh lama lo mansak sawiselna hmuh tur a tam a. Zu zawrh chu sawi loh, kawl leh in hrim hrim pawh kan ramah khap a nih miau avangin man theih chu an ni teh meuh mai. Mahse, zu kan khap dan hi chu a lèr mah mah ṭhin a ni.
Engpawhnise, Leitan thlang deuh kawngpui lun tak sir, mihring kea kalna tura siam footpath-a Pathianni apianga zu inkhawm an awm ṭhin hi tihrem ngei ka phût a ni–a mawi lo a, a him loh bakah, dan bawhchhiatna a ni bawk si. Sorkar enforcement (Police/Excise)-te thenfai chi a ni mai thei a, khawtlang hruaitute thenfai chi pawh a ni thei bawk awm e.
- Zomuansangi Pa