Politics titi khawchang bawk

Hman ni deuh khan Vanglaini lamah hian politics hre deuh mai nia rin theih turin politics chungchang an rawn ziak a, a ngaihnawm ka tih rualin a source kha ka hre chak tlat mai. Tun ṭuma ka source ve thung hi chu ‘tlangkam titi’ a ni a, ziaka dah pakhatmah a awm lo tihna a nih chu!

Congress chhung­kua hi an buai ru a, an minister pakhat bial hmu fuh hleithei lo phi ruai hian a ṭhiante a lo tibuai kual niin an sawi a,a dik ka ring hmiah mai.

He minister hian an term chhungin contractor pakhat chu a lova luakchhuakin a duhsak a, chu pa chuan inthlan dawnah a zia dik tak chhuahin a Congress lo lam a awn ta thut si a, chu minister chu Bhawan lamah a tlatlum ta lova, a buaiin a ṭhiante bial a nih duk duk a, a ṭhiante lah chuan an lo ngaithei lo nasa niin thil hre tak pakhatin a sawi a, ka awih zawng tak a ni.

MNF hi chhim lamah an rin aiin an che ṭha leh dawn lo niin Lunglei lama ka hmelhriat chuan a sawi a, hei pawh hi a dik hmel. Lunglei District-ah congress-in seat awm zawng zawng na la vek a, tunah hian Pu Mahima, Pu Mavala, Pu Mama, Pu Mathana-te hi khingtu tur hian hneh an la inring lo niin MNF lamin an sawi, Pu S Dinga hi a damloh avangin in candidate thei turah an ngai tawh lova, a hmun ruaka ding tura MNF hual hi Congress-in an awk ta chaih si a, Congress hian 100% an hui leh duak thei niin an sawi.

Ṭangrual pawl hian tlin tak tak an inring lo niin ka ṭhianpa Ṭangrual pawla mi ngeiin a sawi. Ani sawi dan chuan, “Tunah hi chuan thudik sawi ila kan tan tlin beiseina a la awm lo tawp a ni. Mahse keini tan chuan seat 5 tal kan lak chuan inthlan lehpek hi kan thlir zawk,” a ti a, seat 5 pawh chu khawi bialah hian nge maw an hmuh theih ang le?

BJP hi MNF nen an thawk dun dawn nge dawn lo? tih inhnialna awm mek­ah hian a tawpah chuan MNF pawisa nei tawh lo leh BJP thawhpui tur zawng hi chu an la inchibai chat dawn tiin Congress-a kan ṭhianpain a sawi a, chu chu Congress tan a hlauhawm theih thu a sawi bawk.

- Lalthanmawia