Chaltlang kham footpath mawlh mai hi

Vanglaini ngeiah hian Chaltlang kham panga footpath an siam hi an siam rei tawh thu leh mipui vantlang tana har­satna a siam leh traffic a tih jam ṭhin thute kha nikum kum laihawl vel kha a nih ka ring kan chhiar tawh ṭheuh awm e. Kum 2020 a lo thlen hnu pawh hian Chaltlang kham lama footpath siam hi a la ngai reng emaw ni chu aw, tih turin a hna a sawt lo em em a, he thilah hian thuneitu lamin emaw harsatna awmte hi sut kian pui turin pen chhuak se tih hi mipui duh dan a nih ngei a rinawm. 

State dang khaw­pui te pawh hi an chei ṭha ve ṭhin a, khawpui lunlai deuh an chei ṭhat chuan chhun-zan zawmin hna an thawk a, an chawl hman mang lova, mipui tana hnawksak nih hlau em emin tlai var varin an thawk a, a rang thei ang bera thawh zawh an tum ṭhin a ni. 

Mizoram khawpui Aizawla kan kawng­pui lûn ber zinga mi nia chhal theih chu Chanmari to Chaltlang Road hi a ni. A sira mihring kalna tur an siam hi an siam rei tawh a, kea kal tan a hlauhawm a, motor lama kal tan a hnawksak bawk si a, January, 2020 ah pawh an la siam zo lo na sa mai si a, a hmanhmawh theih dan a awm em aw? tiin thuneitu lam hian lo bawhzui thei se a ṭha a ni. 

Contractor hi tunge a nih tih pawh kan hre ve lo. AMC siam nge a nih UD&PA siam nge a nih PWD siam nge a nih Local Council siam tih pawh kan hre ve chuang lo; kan lo hriat ve chu mipui tan an thawk rei tawh si a, vantlang tan harsatna a siam nasa tih hi a ni a. He thilah hian contractor hian harsatna lian tak tawkin sorkar lamin pawisa an release hleithei lo pawh a ni ve thei tho bawk. 

Chutihlaiin con­trac­tor hian sorkarin pawisa an release hnu-ah pawhin pawisa hi thil dang tih nan an hmang a, an thawk zo thei reng reng lo pawh a lo ni thei tho. Sorkar nge thiam lo contractor tih ka hre hauh lo a, mahse a harsatna chu hre ve ûk lo mah ila chinfel thuaia siam zawh thuai a ṭul thu tal hi chu mipui hian kan au chhuahpui ve ngam tur a ni. 

He thilah hian dem tur va hriat viau emaw a siamtute hlawk leh hlawk loh lam aiin siam zawh ran a ngai ber zawk a ni. Khawpui lun lai taka footpath siam zo thei reng reng lo state khawpui nih hi kan fate pheikhawk man nen hian a inhmeh lo ve hrim hrim i ti lo maw ṭhianpa?