Change a theih
USA president Obama hunah khan ‘change’ a lar khawp mai a. Kan ram dinhmun ka thlir let a, engemaw kawngah chuan change a thleng. Pu Lalduhoma'n system thlak a tih nen hian a inzul deuh awm e. Kum 1977 velah chuan Transport Bus-a kal turte chu Aizawl D.C office-ah thil kaw zenna an siam a, chu chu bus ticket book-na a ni. Chan loh hlauin pawisa nen kan zen a, a pa lian apiang kha a chuh chak chu an ni mai. Pa awm nem deuh tan chuan hrehawm duh tak a ni.
Krismas dawnin ticket a harsa zual, kohhran upa pakhatin a zen, an innek na sa, a kawr a ṭet, ticket a la chang lo zui.
Chutiang bawkin Zodin Cinema en turin a kaw zen bawk a ni. 'My name is nobody', Django, Enter the dragon tihte phei chu a chuh chak mai bakah black-a ticket la group an awm. Mi chungah an lawn, a hautak ṭhin khawp mai. Ticket chuh ve lo tan chuan a black-a lei a ṭul ṭhin.
Tunah chuan, chutiang chu ṭhangtharte tan chuan hriat a ni tawh lo. Tun laiah chuan system a inthlak ta.
Ration lakna, bank, electric bill, tui bill etc peknaah chuan hming ziah or token a ni tawh. A senior dan indawtin buai miah lovin kan pe ta. Tharum khauh leh awm nemte pawh inchuh buai a ngai ta lo,a hahdam thlakin a standard a sang tawh em em a ni.
Hetiang a nih chuan 'Change' hi a awm thei ngei a ni tih Zoram mipuite hian i hre mawlh ang u. System thlak hian change chu a thleng tihna a ni mai.
NLUP an sem, kan intodelh hran lo, sawrkarna chelh ve lo, leh party dang tan chuan beisei tur a vang, Mizo ṭheuh, Mizoram khua leh tui ni tho, hming tawpa 'a' leh 'i' ni tho, Biak In lawina thuhmun, kan biak Pathian pawh thu hmun, YMA, MUP, MHIP etc ah pawh tel ho vek hi, inthliarhranna a awm fo ṭhin niin a hriat. Hetiang reng hi Zofate kal dan tur a nih loh theih a beiseiawm tawh.
Nakin hunah chuan Market survey fel vek hnu-ah mipuiin thlai an ching tawh ang. Lo an vah ni aṭangin an thlai thar hralhna an chiang tawh ang a, ar khawthim dai tawh lovin hna an thawk tawh ang. Chu chu ‘system thlak’ chu a ni ngei tawh ang. Tun hmaa hahthlak taka ticket kan lak ṭhin chu a system thlak a ni tawh ang bawkin kan ram develop dan pawh thlak a ni ang.
- Vanlalsiama Fanai