Zai leh zai loh inhnialna
Covid-19 hri a leng mek tih kan hriat laiin zai phal loh sawiselna a awm a, kohhran tam tak chu an zai tawh bawk a, hetah hian rilrua lo lang hmasa ber chu, "Anthurium Festival-ah pawh... Hnam Runah pawh... Election Campaign-naah pawh..." tih te a ni a, he inhnialna hi ngaihtuah chian poh leh thil ho tak niin a lang. A chhan chu mahni himna ṭheuh ngaihtuahin hmai kan tuam a, chuvangin kan zai leh zai loh hi phalsak leh phalsak loh vang lam ni lovin kan ngam leh ngam loh ni mai se a ṭha a ni.
Kan zai ngamna hmun chu Politics thilah a lo nih pawhin a pawi lo va, Kohhran pawh an zai ngam chuan inkhawmnaah zai ve tawh mai se, Political party an zai vang ni lovin a him tawha an hriat avangin zai ve mai se, khawvel mipuite tih thik ang deuha zai dawna Political Party lam nek rana hla lo thlan kher pawh kha a va Kohhran tehchiam tawh lo. Kohhran inkhawmnaah zai a ngam awm tawh chuan zai ve chiam chiam tawh mai tur a ni a, chu chu mahni ngamnaah a innghat tur a ni a, mi khapsak vang leh midang zai vanga zai leh zai loh pawh a ṭul tawh chiah loh hi.
Tu emaw an han che sual deuhva lo chhinchhiah kar mai, "Anni pawhin an ti a lawm i ti ve ang u," tih rilru put hmang hi chu thlak ve hrim hrim a ṭha a ni. Miin an tihsual tawh avanga tihsual ve theihna permission nei anga inngaihna, Vanapa Hall lama Anthurium Festival-a an zai leh lam avanga Biak Ina hri leng chung chunga lam ve duhna lek lek ngaihdan lo put hi a mak ka ti ṭhin a, miin dan pawisa lem lova khawvel kût phuahchawpa an lam avanga Pathian Biak Ina hri leng a reh hmaa zai leh lam hmanhmawh em em hi Kristian tihtur dik tak a ni thei dawn em ni?
Keini zai leh lam chak avang hian hri hi lo darh zual ta se la, inkhawm thei lova kir leh kan duh a nih nghal loh chuan, "Zai phal a ni ta e," tih thuchhuah chiang fak awm hma chu insum hram hram hi a Kristian niin ka hria a, Thlarau rahah khan insumtheihna a awm a, Anthurium Festival lama khawvel ropuina uma insum thei lote ang bawka an tih thika zai leh lam phalna nei tawh ang maia mi tihsual denchhena remchanna lei hi Kohhran tihah chuan a mawi lo. Sorkar pawhin tlanchhe chungin LLTF nen inbe rawna zai leh zai loh tih a la dah chhan hi chu zaina hun a la ni lo tihna a ni tih pawh a ṭha khawp mai, zai a hlauhawm loh lai chuan zai phalna hi tu hnen aṭang mahin lak a ngai lo, kan la zai leh em em ang tih ring chungin mi zai i thik lo teh ang u.
- C Lalmalsawma