Sorkar sum neih loh chhan
Vanglaini Editorial lamah khan, "Sorkar sum neih loh chhan hi Covid-19 vang nge thil dang vang?" tih zawhna kha kan lo chhiar ṭheuh ang a, a chhanna chu a pahnihin a ni tih hi a awlsam ber a ni awm e. Mizoram hian thawh chhuah a neih ve loh avangin pawisaah harsatna hi chu kan tawk kumkhua dawn a, chumi piah lamah Covid hian Mizoram mai ni lo India pawh a tihbuai avang hian thawh chhuah nei lo chuan pawisa kan chang tlem deuh dawn a ni.
Hemi thu kan sawi lai lai hian thu dang pakhat zeh tel ve ngai chu Editorial lama lo lang, "Covid-19 dona atan budget pawn lam aṭangin ṭanpuina Covid-19 Emergency Response and Health System Preparedness Package (ECRP) aṭangin Mizoram sorkar chuan cheng nuai 2,879 a dawng tawh. Heng zinga cheng nuai 886 hi ECRP Phase-I aṭanga a dawn niin cheng nuai 1,900 chu ECRP Phase II aṭangin a dawng tawh. Ziaka a lan dan chuan sorkar laipui hian ECRP Phase II hnuaiah hian cheng nuai 3,700 chu Mizoram tana pek turin a pawm tawh a, chuti a nih chuan cheng nuai 1,900 min pe tawhin nuai 1800 vel chu kan la dawn belh dawn niin a lang. Hei bakah hian sorkar hian budget pawn aṭangin hripui dona tur sum hi hlawm lian tak takin a dawng nual tawh a, Northeastern Council leh National Health Mission leh hmun dang aṭangin sum hi a dawng tawh," tih kha a ni.
Hetia pawisa harsat thu kan sawi te, a chang leh pawisa tam zia kan sawite hian mipui nawlpui hi chu an sawina lam lam ah kan thle dual dual a, mi thil chik mi leh hre zau zawkin kan pawisa kal vel dan chiang zawka an han ziah hi chuan kan rin dan hmasa kan sawh sawn leh awn awn ṭhin a nih hi. Chief Minister Relief Fund lamah hian cheng Vaibelchhe 30 aia tam hmuh a lo ni ve leh zel bawk a, Covid dan bawhchhe hremna pungkhawm pawh hi nuai tam tak a nih ve bawk dawn avangin kan sum dinhmun hi a la chhe fahran lo va, tuna hman tur awm lo hi kum 2023 inthlan hisap ranin SEDP tiin pawisa hlawm hi an sem an sem ṭan mai lo vang maw? tih zawhna a piang ta a ni.
Tuna sorkar sum neih loh chhan hi nakin atan a inkhawl tihna a ni ve leh daih thei a, tunah pawisa nei lo anga awmin kum 2023 inthlan tinzawnin kum 2022 vel aṭangin sum hmanga thlem awlsam Mizo mipuite lawmna tawkin Nuai 3 tiamah Nuai 1 pawh tling lovin a vir tawkin First Installment tiin Second Installment awm miah si lovin kan vote an rawn dil leh rinna lian tak ka nei ve tlat a ni.
- Lalremruata