7th Pay bawk!

Hmanni deuh khan kan ti tinaah kan zinga pakhat hian, "Kohhran lam thuah min lo ngaihsak lo ula, tlemlai deuha kan khuaa zirtirtua lo awm zawk, tuna kan inluahna ṭhenawm a mi chu, Middel School-ah a rawn thawk zuai a, a awm peih loh avangin helamah Headmaster post in a rawn insawn a, kan khuaa an post lai chuan school a rawn joint lo tluk a ni. Amah chu Kohhran hruaitu lawk a la ni zui a, ka ngei, ka hmu ṭha thei lo reng reng" a lo ti bawrh bawrh a.

Thu ngai bawk khel leh ang, a pawimawh si a. Inthlana tlin nan chauh a ni lo. Kan pachhiat kan belh chuan hnam hmuhsitawmah min thlen thuai ang. Tun sorkar kum kal ta khan sorkar hi sum indaih lohna avang khan vawi engzat nge a buai kha? Kawng chhia, lei chim, lei min... a va tam em! Khang zawng zawngah khan eng package a mi nge kan hman? Kum khat te pawh kut hnathawkte sawhthing laksak thei lo khan eng vangin nge 7th pay lo hman ve ringawt hi a ngam tlat le? Mirethei te VIP Sorkar chet dan hi hriatthiam a har thlawt a ni.

An rorelna hnuaiah retheiin kan kun tlawk tlawk a, kum khat sawhthing rate ṭha hian thingtlang mite nunah hian nghawng a neih thuizia an hmu lo em ni? A fiahna chu he chanchinbuah ngei hian Pu PL Liandinga’n chiang takin a rawn thai lan tawh kha. Hmanniah MLA pakhat chuan thu chhuahin, a bial chhunga sawhthing la nei te rate a ngaihtuahsak theih thu a chhuah tlaikhawhnu a. Aw...a va han hun tawh lo tak em! Kut hnathawk ten tihngaihna an hriat tawh loh avangin, a chhiat ngawt aiah tiin chawibelh lek lekin an cho vek tawh, a tir te an mangan em em lai khan tinge in ngawih tlat ni? Inthlan dawn ang khan, in hnena in report ngai lo hian kan banphakah in awm thei tawh lo em ni? Nge ni, nei sa pek belhah in buai lutuk a, 7th pay a an hlawh tur pawh kual dan tur in ngaihtuah?!

7th pay vanga kal belh tur vaibelchhe li leh a chuanna tamzia hi! Kan state leiba hi a aiin a tam let nasa mai sia, 2030 vision neiha rulh tur kha em ni ang? Nge kut hnathawk te chan tur in rawk leh dawn? Eptu party lian ber inti lah khan, session-ah meuh kan pe dawn kha a ti riap mai si a. An inlei tlinna tur senso rulh nen ba kan ngah leh dawn mang e. Nge ni, in tlak hlau hian pek ve in rel chawp mai em ni ang aw?... Eptu lamin mawng dek bawk, sorkar hnathawkhnura te lam tan duh bawk, a buaithlak a ni e! Kan dinhmun hi, ringlo mite drip khaiah Mawithlawna te Mawithlawni te, Ringtuliana te, Intiveii te kan leng leh vel dawn a nih ber hi.

Hman chhan zeldin zel ang!

Risk sang tak la a 7th pay hman rel tluk a hnu, zeldin thua hman chhan lo sawi ve hi a pawina em em awmin a lang lo. Mizo thawnthu hlui tak tak ṭhenkhatah kha chuan eng tin tin emaw ṭhanglian khan lal te kha an nihtir a, tiang deuh chu kan ang awm mang e. Tunah awm lo mah se, eng tin tin emaw pawisa chu pawhkual tur a awm leh mai ang! An ti a ni mahna!

Kan state population phu loin sorkar hnathawk kan ngah em em a, Mahnihmasiala te hian, ram dinhmun ngaihtuah lo lek hian, "Kan hotuten hlawh pun an rel" tih chuan kan Amen rual dual thei zel si. Tah chuan ram kan vei lohzia, kan dinhmun dik tak kan ngaihven lohzia a lang! Chungho, rawngbawlna ni lo, eizawnna atan chauha sorkar hna thawk mai chuan dan ang leka thawh hi a duhtawk kumkhua ang. Chungho vote chu a ni an duh zawk ni. A hnathawk ngei te hian kan ram dinhmun hria a, an hlawha lungawi tak tura kan ngaih laiin, pun turin nuar meuhin an han nawr zet kha zawng; mak tak a ni mak tak! Nge ni an rapthlak hial zawk!

Sorkar hna kan ta neih lohzia a lang a, amah sorkar ngei pawhin sorkar hnaa sum kal chu a ma mimal hlawkna tur a nih chuan dik lo deuh pawh nise a pawm duh zel. Sorkar ngei pawhin a ta neih duh tawh lo. Ṭhenkhat hi chuan hna nghet kan hmuh veleh hian ka chawl thei emaw tiin, hlawhtlingah an inngai a, an thatchhe ta tlat ṭhin hi kan chhiatna hmawr a ni bawk. He mi chungchang pawh hi khel zui fe tham a la ni ang.

Chhungril tak chuan 7th pay kan phu lohzia hi chu kan hriain kan pawm vek ang. Tam tak chuan a ṭha lo mang e, kan va phu lo em pawh kan ti maithei. Mahse tinge thawm hi a reh em em? A chhan chu keimah bulṭan ka tum lo hi a ni. Hetiang chu ka vei phak leh kan sawi ve phak a ni lo, ka hre tlem si, kan ram dinhmunin a pha lo, neisa pek belhna a ni tih chiah ka hria a, a bak ka hre thui lo kan ti a ni mahna. Engpawhnise, kan vei a, ṭha lo kan tih hi chu kan sawi ngamin kan chenna ram kan hmangaihna hi kan theih ang tawkah kan ti lang ngam tur a ni dawn lo em ni? Eiruk vang hian tu tu te emaw chu Pathian hian a la hrem mahna. Mahse nang leh kei pawh hian, engmah kan lo tih bik loh avang hian tuarsa reng chungin malsawmna hi min pek phah chuang lo maithei a ni. Ngaihtuah chian hian, thil ṭha tih tur hriaa tih tum si lo nen kan danglamna a tam lo viau ta ve ang.

Kan ram hi hmangaih ang u...

Hei lo chu ram kan nei lo a, kan nei ngai tawh bawkin a rinawm lo. State hausa chu kan ni thut kher lo ang a, inrelbawlna ṭha ber pawh kan ni thut kher lo ang. Mahse, kan neih mil leh kan ramin a thawhchhuah phu tala kan nun thiam chuan, khawi state mah hian min hmusit bik lo ang. Mahse tun anga kan kal a, kan la kal zel bawk chuan, drip min petute nuihzatah leh an ke hnuaiah hian kan kun kumkhua ang a, ram pawna rinna nena kan tirh kan missionary chhuanawm tak tak rawngbawlna hi a sawt mawh viau reng bawk ang. Kan missionary te kan puih theihna ṭha tak chu, an inpui te belh chian kan dawl hi a ni. Tunah chuan Kristian ram hi ringlo mi chawmah awmin kan thawh chhuah phu loin kan nung bawk si a, an ringtu rawn siam leh an rawngbawlna hmun mi te hian kan missionary te rawn chawr chhuahna ram hi min rawn hmu pha ve tho si a, kristian ram hi min ring rih lo a ni ber e.

Tin, kan tun dinhmunah chuan sawrkar hna thawka ten inphah hniam an tum lo hi thilmak a ni tawh hran lo a, keimahnia bul ṭan ve a ngai a ni. Hetiang ang issue lian lutuk veiawm si bulṭantu nih leh sawitu nih hi hreh lo tlang ila, thil eng emaw tal tih hi kan tum ve tur a ni ang. 7th Pay hi kan sawisel ngawr ngawr a ni lo, kan inrelbawl dan leh kan dinhmun en hian, kan phu rih lo lutuk hi a ni kan sawisel ni.

- RsZuala Renthlei