MPSC hnalak ṭhenkhat Thingtlang miten kan tuar

Tun hmain de­partmental a hnalak ṭhin a nih khan kan officer leh politician-te an inrawlh nasain, mipuiin thil fel lo kan hre ṭhin. Mahse, tuna MPSC in hna a lak hnu hian thingtlang miten kan tawrhna hi a nasa zawk em aw a tih theih. A thiam leh tling lak an ni ta a, thingtlang miten kan elpuite chu zirna ṭha zawk dawng leh hmelhriat ṭha neite an ni tlat!

MPSC in hna a lak ṭhenkhat hi chu department-ah dah let leh se tih hi ka ngaihdan a ni. Hna lak a nihin khawpui mi mithiam zawkte an tling a, mahse, an post-ah awm ṭha lovin aikal an tir emaw hmunpui zawkah attach dan an zawng leh a, a tuartu chu a hna awmna thingtlang lam mite kan ni.

Chuvangin, department-in la se, a thiam thiam ni lovin, an qualify ve tho chuan a hmuna awmchilh thei lak mai hi sorkar tan pawh a hahdam thlak zawk ang.

Amaherawhchu, department a dah let a nih dawn chuan Dan fel tak duang se. A hna awmna khua/ veng mi ngeiin a dil chuan duhsak nise, dil thei an awm loh chuan chumi hna awmna block/ district, chutianga hnalak chu awm se chuan tuna sorkar hnathawk mahni post a awm ṭha duh lo tih hi kan pumpelh thei ang; a zawng zawng chuan pumpelh thei lo mah ila.

Kan politician-te pawhin an bial chhunga hna, an bial mi ngei a hmuna awm thei tur an lo duhsak a nih pawhin a ṭha zawk. Tunah hi chuan thingtlang miten khawpuia awm leh a thiam zawk, hmelhriat nei ṭha zawkte kan el a, kan la tluk chiah si lo. Hna an dil a, an tling a, an awm ṭha leh duh si lo. Helai tak hi a ni kan siamṭhat ngai chu. Mithiam mahni post a awm duh lo ai chuan thiam ve tho mahni awmna hmun ngeia thawk thei an awm chuan a ṭha zawk.

Zirlai pawla ka inhman ṭantirh lam­ah MPSC-in hna tam zawk an lak theih nan kan bei a, hei chen zirlai pawla ka awm hnu hian kan problem tam zawk sut kianna tur chuan department a hna lak ṭhenkhat dah let hi a ṭha ber awm mang e ka ti leh ta a ni. Dan erawh fel taka duan nise, a qualify lo lak lam ka sawi tel lo, an thiamnain a tlin ve tho chuan hna awmnaa awm thei tur lak nise tih hi ka duhthusam a ni.

A tawp berah chuan thingtlang lam NGO leh thingtlang lam bial ngah deuh MLA ten hei hi ngun zawka kan ngaihtuah tlan a ngai. Chuti lo zawng, kan tawrhna tam zawk hi a reh lawk lo ang.

- Biaksiamtluanga