Kawngpuiah inkhel lo ang u

Hman kum deuh khan Lunglei-ah sawn kan hmelhriat pakhat chu kawngpuia bike a khalh laiin ui kawng kân nen an intawng fuh palh a, ui chu súin, ani chu a tlu zui a; hliam na tak a tuar a, a hnu lawkah a hliam chu tuar loin a boral ta mai a. Tlangval lian ṭha thelh thawlh, fel tak mai a ni a, a uiawm hle. A chetsual dan hi a ho ang reng viauin a lang thei nã a, a vanduai a, a thih phah ta hial a ni.

Tunlaiin Aizawlah hian veng ṭhenkhatah kawngpui inkhel hmuh tur an awm fo a, ball pet, basketball khel leh badminton khel an ni deuh ber. Regular taka kawng­puia inkhelhna ṭhin hmunte pawh a awm.

Heng, kawngpuia inkhel ṭhinte hian sim thei se a duh­awm khawp mai. Kawngpui, lirthei tlan tamna hmuna inkhelh hi a inkhelte tan a him lo a, lirthei khalhtute tan a him hek lo. Tu tan pawh a him lo a ni ber.

Kawngpuia inkhel ṭhinte hi lirthei tan sut palh an hlauhawm em em a, insutna thleng palh ta se, a tuartu tan thihna hial thlen thei leh ramtuileiloa awm phah theihna a ni a; a sutu tan pawh thubuai neih theihna a nih bakah, rilru hrehawm taka awm phah theihna a ni.

Kawngpuia inkhel ṭhinte hian fimkhur inti viau mah se, inkhelh laklawh lai chuan fimkhur reng a har fo a, chu chuan thil pawi tak a thlen thei. Intihpalhna thleng thei mai bakah, lirthei tlan vel an tibuai hrim hrim bawk.

Mihring insut palh a hlauhawm mai bakah, two wheeler tan chuan kawngpuia ball lìr hrim hrim pawh a hlauhawm tel. Kawngpuiah an lo inkhel a, chutih lai chuan lirthei a rawn tlân a, lirthei a tlan tih hriain inkhel lai chu tawp an tum ve ngei a, mahse, ball an man/ tihtawp hman loh cháng a awm fo.

Chutiangah tak chuan two wheeler tan a hlauhawm em em mai. A tìra kan sawi, tlangval pakhatin ui a sut palh vanga a thih phah hial ang khian, ball lìr chu two wheeler-in a sír tê pawh a rah palh chuan tlûk phah theihna a ni a; vanduai zualah phei chuan na taka inhliam theihna leh, thihna hial thlen thei a ni.

Kawngpuia inkhelh chungchangah hian a inkhela te, an nu leh pate mawh a nih rualin, khawtlang hruaitute mawh a ni ve bawk ang. Kawngpuia inkhel ṭhin tam ber hi naupangte leh tleirawlte leh tlangval la naupang deuhte an ni tlangpui. Nu leh pate'n kan fate kawngpuia inkhel lo turin a hlauhawm dante nen kan hrilh chian a, kan thunun a ngai ang.

Chutih rualin, nau­pang, an tana hlauh­awm pawh ngaihtuah chang loa nuam an tih vanga inkhel lui ṭhinte an ni ve fo bawk a; chuvang chuan, khawtlang hruai­tute'n kan veng chhung ṭheuhah, a bikin lirthei tlân tamna kawngpuiah chuan inkhelh khap bur chi a ni bawk ang. Hetiangah hian khaw­tlang inrêlbàwlna ṭha leh ṭha lo te, inkhuah­khirhna ṭha leh ṭha lote a hriat fo.

Chuvangin, chhiat­na lian zawk a thlen hma leh, 'A va pawi tak em' kan tih hma hian i inven lâwk teh ang u. Upate chuan, 'Fimkhur nâk nâk chuan, vanduaina kan tihte pawh hi pumpelh theih chin a awm ve a nia' an lo tih ṭhin kha.

- K Zoramchhana