POLITICIAN THUSAWI!

Amah chu tlangval fel tak niin kum lamah pawh la upa lo tak a ni a, MA passed hlimhlawl a ni.

Tichuan Politician pakhat, senior tawh tak leh ram hruaina kawngah pawh sulhnu ṭhahnem tak lo hnutchhiah tawh chuan a passed lawmpuiin an inah chuan a va kal a. Pawisate pe ta sela a hriatthiampui awm viau nain a ni hi chuan sum pek lam leh eng emaw pek lam tum loin ‘Kan Sorkar hunah Chief Minister ka ni ang a, ka Personal Assistant-ah ka dah ang che’ a ti ta daih mai a, a va ropui tak em. A dawngtu tlangval tan hi chuan mitmu a pawng zawr thei hial ngei ang le. Sorkar thei hlauh sela, a ṭawng ang ngei hian CM Persional Assistant ni thei ngei se la tiin duhsakna ka han hlan nghal duh bawk.

He tlangval dinhmun ka ngaihtuah hian lawmawm ka ti takzet a, he a hrilh aṭang hian a awm dan pawh a danglam ngei ang a, a lawm em avangin an chhungkua chauh pawh ni loin an ṭhenawm khawvengte hnenah pawh a hrilh ngei ka ring. Chapo mi a nih phei chuan a kawngkal te reng reng pawh a hawi valh valh ngei ang le.

A enga pawh chu lo nisela, tun aṭanga chawei a sawm hialpawh an duh rum rum thei bawkin an chhungkaw tan chuan thu hriat nuam tak chu a ni reng reng a ni. Kei, ka dinhmun aṭang phei hi chuan hetianga thu lawmawm hi dawng ve ngat ila chuan ka lawm avang hian zan ka mut theih loh phah hial ka inringi a, ka awm mai mai theih pawh ka ring lo hial. Ṭhenawm khawveng mai bakah ka chhung leh khat te chu rang taka ka hrilh kim vek nghal ngei ka inring bawk.

MA passed hi thil har tak mai a ni a, ṭhenkhat phei chuan MA zir zawh hi chuan lehkha zir tur ka zir zo ta te pawh an ti hial bawk reng a, zirna tawp a zir zo a tih theih hial bawk awm e. Chutih laiin he tlangval hi chuan khawlai hmun emaw a hna tenau pawh nimai lo Chief Minister, Mizorama lal ber kiangah ṭhuin a PA tura sawmna a dawng ta mai si a, a lawmawm dan hi ka sawi thiam mai lo a, a lawmawm over tawp a ni. He Politician te sorkar hunah chuan dinhmun sang taka a han ṭhu mai tur hi engtiklai maha mumang lamah pawh a la man chhin hi ka ring lo a, lawma nuih ver verna tur thu lawmawm tak a ni.

Nia, he kan Politician pa hi tawnhriat lo ngah tawh tak mai a ni a, ram leh hnam tan pawh rei tak lo rammu tawh niin kekawr khup ṭet haa a sur a sa hnuaiah pawh ke lo pen tawh a ni a, a thluak pawh a ṭhat hmel viau bawk. A hmel en reng rengin a Mizo pa em em a, a ngainatawm bawkin a titi ngaihthlak pawh a nuamin a bula awm pawh a hahdam thlak a, ṭawng lam hi chu a talent ber pawh a nih hmel.

CM pawh term hnih lai lo ni tawh a ni bawk a, Sorkar kalphung chu hre tak tawh tur a ni a, hetia tlangval MA passed chhuak PA atana a lo hual lawk pawh hi keini’n theih ngawt loh tura lo ngaih chi a ni lo ang. A ni berin a theih a tih chuan a theih a nimai. ‘Mizoramah mau matric ton tluklehdingawn 25 a awm a, chungte chu hralh ila kan kum 200 ei tur buhfai a lei theih a ni’ a tih te pawh pawmsak mai tur.

Tin, ‘Kalkatta-ah ka zuk kal a, mau chikna khawl siam dan ka hrilh a, a nawhmanna khawl pawh a rawn thleng tep tawh’ a tih pawh a rawn thleng mai tura ngaih tur. Buldozzer te chi, tlang lawn thei a awm a tih pawh a Chief Minister huna a chah thlen ngei pawh i pawmsak zel ang u.

Heng bakah hian Sapthei sawrna khawl huana kala sawr zung zung thei pawh a ni chuan a hre bawk a, an sorkar hunah kan la hmuh ngei beisei tur a ni. Hetiang hian Mizoram tan thil ṭha tak tak a hria a, hmasawnna tur thil pawimawh tak a nih ngei pawh a rinawm. A rawn thlen a, kan hmuh hunah chuan tu emaw chu lo halelui ta vak pawh ni sela i dem lo ang u. A lawmawm dawn em asin.

- Mahmuaka Chhakchhuak