Aizawl - Shillong zinkawng

Tun hma lam deuh kha chuan Aizawl leh Shillong inkar zin hi ni hnih zet thang ngai a ni ṭhin. Tunah chuan dar­kar 14 vel lek hmanga zin theih a ni ta a, Sumo service ṭha­hnem tak a awm a, ṭha­lai leh hmanhmawh tan chuan a awlsam zual a, lawm awm tak a ni.

Aizawl- Shillong kalna atan hian Bus (MST) hi Mizote kalna ber ani. Tuna MST Bus kal hun hi passenger te hmakhua thlira her rem hret a duhawm hle mai. Aizawl aṭangin chhun dar 12 ah Shillong pan tur Bus a chhuak a, tichuan Shillong hi zinglam dar 4 aṭanga dar 5 ah te an thleng ṭhin tlangpui; hei hi Shillong thlen in zawng ṭhin te tan a buaithlakin a hma lutuk a. Chhungkhat laina nei ṭha lo deuh hmelhriat ina innghat tur te tan khawvar hmaa thlen in kaih thawh thin te hi a hrehawm a, inthlahrun a na duh khawp mai. Hotel a thleng tur leh House a thlen dawn pawn a hma lutuk.

Shillong Damdaw In lam pan tur mi tam tak te tan te hian a buaithlak a, khawvar hma a, Bus aṭangin an chhuk a, taxi puten an duh zah zah chhiarin an phur a. Damdawi In in enkawlna tur pawisa neih chhun chhun kengin kawng sira chhuktir tawp mai te hi vanduai tawh palh hlauhawm tak a ni.

Tichuan Aizawl aṭang hian chawhnu dar 2 emaw dar 3 ah chhuah nise, passenger te tan thawk huaina thama ṭha a ni ngei ang. Shillong aṭanga Aizawl pan hi chawhma dar 11.00 ah a chhuak ṭhin a, hei pawh hi a hma a ni. Muangchanga kal pawhin driver-ten kawnpui dai thingpui dawr ei tur awm fumfe loh­naah Aizawl khawvar a thleng turin passenger te an chawlhpui a, darkar khat aia tam fe te chawlh a ngai a. Khawthim laia Aizawl thlen a, passenger te tana hrehawm tur pumpelhna tura tih a ni ṭhin.

Shillong aṭang hian chawhnu dar 1 emaw dar 2 ah tal chhuak se a zia awm khawp ang. MST Driver ten Gauhati aṭanga nu (nu­thlawi) pathum/ palite bungraw ṭhahnem tak la, cabin-a an phurh ṭhin te avang hian Shillong aṭanga Aizawl kal ve turte bungrua, bags, etc. te dahna tur a vang thei em em a, heng sumdawng nu (nuthlawi?) te avang hian bungrua neih ang angte dahna awm ṭha thei lo hi a ti thei hotuten enfiah ngam a ṭha khawp mai.

Bus hi khualzin passenger te tana buat­saih a ni a, sumdawngte tana buatsaih a ni lo tih an hria a, driver te pawh sawrkar hnathawk hlawh nei, D.A bill ṭhin reng te an ni a. Passenger te hmakhua ngaih deuh a duhawm hle tawh a ni.

Driver te leh con­ductor te thawhhona hi hei ai hian ṭha se. Driver te hian conductor te hi an thawhpuite an ni ve tih an hriat a, in ngaih pawimawh tawn a ṭha hle a ni. In siam ṭhat a ṭha khawp mai hawk. MST bus seat chang lo mi tam tak awm nitin a ni ta.

Capital bus hi Mizote Shillong - Gua­hati kalna pawi­mawh ber pakhat a ni hawk. Anni hi private an ni a, nimahsela an bus a ‘khumfa’ awm passenger te tana hrehawm tak pawh hi an in enfiah a va ngai tehlul em! Bus-ah passenger te a seh mai ni lovin ‘khumfa’ hi passenger ten an kai a, put darh a hlauhawm. Tunlai khawvelah bus-ah ‘khumfa tam’ a ṭhing tawp, thuneitu, aw-ka nei thei te chet a va ṭha em!

- Lal-Sailova