Tu maw bial nei lo tak tak chu?

Congress ho khan an thuchhuahah meuh khan MNF lama am mi lawk deuh deuhten dinna tur bial an la neih loh thu kha an sawi a, tunah hian Congress mi lawk bial dinna tur nei lo an awm nual tawh an ti.

Congress OB pakhat hian a bialah din a tum tawh loh thu a puang vei ngawt a, tichuan bial hrang hrang a melh kual a, a zin a zin a, a vei kual dek dek a, ngaithei lotu chu a bial lo hual vetu Congress mi bawk an ni a, Congress OB pakhat bial nei lo hian an party a tibuai ru mek. Tunah hian Hmar ho awm bitna lamah hian thawm a nei leh ṭan a, helai bial sitting MLA pawh a ngaih a ṭha vak lo an tih kha.

MNF lamah pawh bial hmu lo OB pahnih an la awm. Pakhat zawk hi chuan Congress hmeichhe MLA bial hi a nuthuri zuam vei ngawt a, a han zin kual vela rin aiin tawh a lo khirh si a, a bul lawk bialah inben bel a tum ta. He bial hi MNF hunlai khan Sports Minister-in a lo zin chilh tlut tlut tawh si a, Chhim lamah sawn MNF leh party dang inbeih hmain MNF leh MNF inbeihna a thleng hmasa dawn an tih chu.

MNF sorkar hmasaa mi thiltithei ber pawl pakhat chu tunah hian biel nei lovin a awm bawk a, Aizawl daia a dinna ngaiah a ding nawn ngam lova, khawthlang a melh a. Tunah chuan khaw chhak a melh leh tawh a, tun thlengin a ngaih a la ngam lova, a la hawi tawn zak zak an tih chu.

Bial nei lo sawi takah chuan ZPM hi chuan bial hrang hranga ding tur an la hmu kim lo a ni awm a, hei pawh hi bial nei lo chi dang a ni.

- Lalthanmawia Khiangte