MIZE ROPUI NEI PU HAWLA
“Remna siamtute chu an eng a thawl e; Pathian faa vuahin an la awm dawn si a,” (Matthaia 5:9).
Congress party-ah hian mi tlawm te te, mi nep te te kan awmkhawm a. Mahse, chung mite chu ṭangrual theia siamin, party ropui leh chak takah Pu Hawla hian Congress party a siam thei a; Mizorama political party zingah Pathian zara sorkarna siam rei ber chu Congress party hi a lo nih phah ta a.
Congress party hi sorkar lo se, Referral Hospital kan nei lo vang a, Tuirial Hydel Project a hlamzuih hlen ang a, mirethei sang tam takin NLUP hmangin an dinhmun an siam ṭha lo vang; Mizoram State Health Care pawh tun anga kalphung ṭha hian duan thar a ni hauh lo vang. Mithiamte’n tehna hrang hrang hmanga an teh pawhin Congress sorkar hnuah India rama state te (small state) zingah Mizoram hi hmasawn ber pawl a tling phak a, 1-na, 2-na, 3-na hauhna tam tak a nei a. Tute emaw lal ve chakin Mizoram hi a beidawng zawng ringawta sawiin, India rama State rethei ber angin chhuah tum ṭhin mah se, mithiamte tehna aṭang chuan Mizoram hi India ramah kan ‘Te Ber Tawp Lo’ a ni.
Pu Hawla hi amah hrechiang lote’n rinthuin a chungchang thil tam tak sawi ṭhin mah se, ‘Thuhnuairawlhna leh inngaihtlawmna’ tel lo chuan a thlen chin hi tu mahin kan thleng thei lo ang. Pathian thu thianghlimin, “Inngaihtlawmna leh Lalpa ṭih man chu sum te, chawimawina te leh nunnate a ni,” (Thufingte 22:4) a tih angin Pu Hawla’n Congress party a awp chhunga a Malsawmna dawn zawng zawng hi Pathian thu a awih vang a ni ngei ang. Mizoram a Party lian ber zinga mi President a nih avangin a chang chuan intihhlauhawm te, intihzahawm te, a tawk chauha mi inneltirte a ngai a, chutiang chu a thiam em em a; intihnelawm loh thlengin a thiam em em a ni. Mahse, a rûk takin a thinlung chhungah Pathian ṭihna a neih tlat avangin Pathianin a hun takah a chawimawi leh ṭhin; thutlukna a siam sual khat hle a, a dawhthei em em a, party chhunga amah sawisela beitute ngei ngei pawh a ṭul chuan party mipui hmaah an hming meuh lam chhuakin a fak hreh reng reng lo.
Kum 2018 kum tawp aṭanga eptu party hruaitu a nih hnuah Pu Hawla ka hmuha ka rilrua Bible chang lo lang ṭhin chu, “Lal thinlung chu Lalpa kutah a awm a, tui luanna kawng angin, a duh duhnaah a tikawi ṭhin,” (Thufingte 21:1) tih hi a ni. Chief Minister ni tawh lo mah se Congress mipuite tan hruaitu ropui ber, Zoram politics khawvelah chuan an lal a la ni chiang hle. Congress party President aṭanga chawlh a tum leh tum loh chungchangah pawh tu mahin he zawhna hi kan zawt ngam lo. A thinlung Lalpa kutah a awm tlat a, a ruka a ṭih em em Pathian kutah a innghat tawp ni berin ka hria. A tan chuan thutlukna siam hrehawm tak a ni ang a, mahse ‘Thuhnuairawlh leh inngaitlawmte chawimawi ṭhintu Pathian’ chuan Pu Hawla hi chawimawi a la duh a nia’nge.
Hmanah kan naupan laiin ‘Mizorama Remna leh Muanna a awm theih nan Pu Hawla’n Chief Minister lalṭhutthleng a kian’ an ti a. Kha inhlanna mak leh dangdai tak kha ṭhangthar, kum 2000 hnu lama piangte hian a hlutna leh a ropuina kan man pha lo va, kan theihnghilh ṭan mek. Kha inhlanna ropui tak khan a kaihhruai Congress party chu Pathian Malsawmna dawntirin, rorelna ṭhutphaha ṭhu tlakin a siam a, Mizorama sorkar tawh dang zawng zawng aiin Congress sorkar sulhnu hi Mizoramah hmuh tur a tam ber. Mahse, ‘Tui luanna kawng anga lalte thinlung tikawi ṭhintu Lalpa’ chuan chawimawi nawn leh a duh Pu Hawla thinlung tikeh sawmin Mizoram Politics chanchina tumahin an la tih ngai loh thutlukna a siamtir a, midang kutah Congress party kaihhruaina hna a dah dawn ta a. Congress chanchinah mai ni lo, Mizoram politics chanchinah Pu Hawla hi zir tham a nihzia ṭhangthar thil chik mite’n an la rawn hre dawn chauh a ni.
- Dr Lallianchhunga