Aizawl khawpui zauh dan tur
Tunlai chu kawngchhawng leh lei verh reng rengin mipui an inhnial a, mipui nawlpui ngaihven lem loh khawpui zauh dan hi ka rilruah a lo lut ngut ngut a, Aizawl khawpui hi zauh ta duai mai ila, chu chu Mizoram tan thil ṭha, khawpui pawna awmte khawpuia luhna remchang leh mihring hmasawnna atan thil ṭangkai a nih rinna nen thiam lo chung chungin point pathum ka rawn thai lang ve teh ang.
Economy a ṭhan dawn chuan a mihring hian kan daih ve a ngai ṭhin a, Mizoramah hian mipui kan la tlem avangin thil tih a harsatna khua a tam khawp mai. In 300 khuain sikul hran an mamawh a, êng pekna line an mamawh a, tui pekna an mamawh a, kawngpui ṭha an mamawh a, damdawi in (Health Sub Centre) an mamawh a, chutiang chu an mamawh zualpui tak tak (Basic needs) a la ni zawk a, hengte hi Mizorama khua in 300 china dah vek kan tum avang hian kan rama sum pawh a hek a ni. Damdawi in pakhat chhawrtu an tlem ta em em a, sikul pakhat chhawrtu an tlem avangin pawisa khawhralna a ni a, chu chu state budget aṭanga chhuakin zirtirtu zirlai nei lo hnenah sum kan pe thlawn a, Nurse tlawngawl angreng tak tak an awm phah a, chutiang zelin thawktu dang pawh a ni.
Khawpui kan zauh theih chuan chutah chuan thingtlang hi a khua a khua hian suan lut ila (Thil theih loha kan ngaih chhung chu a theih ngai dawn lo va, a theih titu sorkar kan neih chuan chu chuan an ti thei ang), tuna Aizawl khawpui daifem Durtlang leh Rangvamual ram inkarahte hian khaw 10 vel hi dahkhawm thei ila chu damdawi in pakhat inṭawm tur leh sikul pahnih pathum inṭawm turin an rem fel theih asin, hetiang hian khawvel hmun dang chuan 'hmasawnna' tih hi ruahmanna an lo nei daih ṭhin a ni. Mualpheng lam leh Sihphir ram lamte awl duai mai hi khawpuiah siam rem ila, khaw ṭhenkhat hi rawn lut se chu kan zavaia tan a ṭha dawn a ni.
Hetiang thil ngaihtuah chhuak thiam, inzir mi poli-tician hi Mizoram hian a mamawh a ni, tuna kan buaipui kawngchhawng tih vel hi chu a nêp the the lutuk a, construction company hna pakhat tawk vel kan chai laih laih chhung chu mi chhiah tlingkhawmin kan khawsa zel dawn a ni.
- Lalremruata