Responsibility >>> THE BUCK STOPS HERE - Huna Kawlni Kawlvawm

Indian filmstar lar tak Salman Khan hi kum 1998 thla khan 'Hum Saath Saath Hain' film an chan laiin Rajasthan thingtlang khaw pakhat, Kankani khaw ramhnuaiah sakhi chi khat Mizorama awm ve chiah lo 'blackbuck' pahnih a kahhlum avangin October 12, 1998 ah Wildlife Protection Act hmanga man a ni a, kum 5 chhung lungin tang tur leh Rs. 25,000 chawi tura tih a ni. A tan chen, a thu buai kal zel dan kan chhui lo ang, buck sawi lan duh vang a ni e.

THE BUCK STOPS HERE

He (phrase) hi a awmzia chu thil, thil eng emaw lo thleng a, chu thil thlenga mawhphurhna chu midang burbun emaw hlanchhawn emaw tum loa, mahni ngeiin mawhphurhna la tihna a ni. (The responsibility of something cannot or should not be passed to someone else. Eg : When you are goalkeeper, the buck stopped with you) .

Meriam Webster Dictionary : To any that one accepts a responsibility and will not try to give it to someone else. Eg : I am willing to accept the blame for what happened. The buck stop here with me.

A ṬAWNGKAM BUL

European-ho America rama an luh thlak hum hum a, an inbenbel hnu tawhah khan lehkhaden hmanga infiam leh sum inchawi an ching a. North America lamah poker hmangin card 5 chiah semin an indeng ṭhin a, a semtu tur chu chemte a fawng sakhi (buck) ki hmangin an zawng ṭhin a, sem ngei ngei tura ngaih leh midang kuta chu buck chu hlan lo tura ngaih a ni. An sem duh loh chuan, "Pass the buck" an ti a, he ṭawngkam poker game khel ṭhinte hman ṭhin hi President Harry S. Truman khan awmze zau zawk neiin a rawn vawrh lar taa ngaih a ni.

PRESIDENT TRUMAN

Harry S. Truman US President 33na (1945–53) khan President Oval office he thu "the buck stops here" tih hi a dawhkan hmaah a dah a. President a nih chhunga a auhla leh thu ken pawimawh tak a ni.

President Truman hian ṭum khat chu El Reno, Oklahoma ah Federal Reformatory (Jail) a tlawh a, hetah hian a ṭhian pakhat Fred A. Canfil chu Warden a ni a. He taninah hian "The buck stops here" tih intar chu a hmu a, ṭha a ti hle a, siamsak ve turin a ti a. October 2, 1945 khan office dawhkana hun theih chi a sei zawng inches 13 leh a hlai zawng inches 2 ½ "The buck stops here" tih inziak leh a hnung lama President lo sei lenna tihlanna "I'm from Missouri" tih chuang chu thawn a ni.

President Truman hi Franklin D Roosevelt hnuaiah Vice President a ni a, FDR kha president thlan tlin a nih hnuhnung ber aṭanga thla 4 pawh tling lo a chelh hman chauh tihah April 12, 1945 khan a thi ta mai a, vice president Harry S. Truman chu President a ni zui nghal a, a term khatna chhung hian vice president nei loin a hmang tluan ta nghe nghe a ni.

Harry S Truman hi Democrats a ni a, kum 1952 president inthlanah chuhin a tling a. Hetih hun lai vel hian America ram chhungah politician te leh Sorkar official te zingah hlepruk a hluar hle lai a ni a. President inthlan campaign au hla zinga pawimawh takah "The buck stops here" tih chu huaisen takin a hmang zui ta a. Eng thil pawh a chhia emaw a ṭha emaw pawh lo thleng se, ka mawhphurhna a ni, tu 'ma hnenah mawhphurhna hi ka beng per emaw midang puh let ka tum lo ang, tih hmang chuan American mipuite thinlung chu a hneh hle a, president pawh chu hneh takin a ni zui a.

Kum 1953 kum tawp lamah president nihna a chawlhsan dawn hnaiah amah thlahna inkhawmah pawh he thu bawk hi sawi chhuak lehin, "President hi mi tu pawh lo ni se, rem a ruatin ro a rel tur a ni. Mi tu mahin ro an relsak tur a ni lo. A hna a ni," tiin.

"The greatest part of the President's job is to make decisions - a big one or small one dozen of them everyday. The paper may circulate around the Government for a while, but they finally reach this desk. And then, there's no place else for them to go. The President whoever he is–has to decide. He cannot pass the buck to anybody. No one else can do deciding for him. That's his job".

- Harry S Truman

HEI VE THUNG HI

1. Mizoram chhungah hian thil thleng chi hrang thleng tawh chungchangah "DC te ka zawtchhuak thei lo, A kilhna miin an ruk vanga chim a ni, Official te thiam loh a ni, Compensation hnam kan ni, Fur chhiat leh ruahsur nasat vanga kawng chhia a ni, Mipui thiam loh a ni," etc tiin midang thiam loh leh mawhphurnaah kan beng perin kan sawi pial zel dawn nge, "The buck stops here" kan ti ve ngam dawn?

2. The buck stops here, ti ngam ngat Mizoram hruaitu hi eng tikah nge kan neih ve ang, tih hi mipuite nghahhlelh ber zinga mi a ni ngei ang.

Source :

A Dictionary of Americanism on Historical Principles, Chicago, University of Chicago Press, 1951, page 198–199

Economic Times

May 7, 2018

Huna Kawlni Kawlvawm